Asnjë pikë në dy ndeshjet e para. Një start anormal për Zonjën e Vjeter që kërkon të hedhë pas krahëve atë çfarë ka ndodhur në 180 minuta për ta nisur gjithçka nga e para. Kundër Chievos, trajneri Massimiliano Allegri kërkon që ekipi të rigjejë buzëqeshjen.
“Chievo do të kërkojë fitoren edhe në fushën tonë. Do të jetë një ndeshje delikate dhe ne duhet të mbrohemi mirë. Ndaj Chievos nis një muaj i komplikuar me nga një ndeshje cdo tre ditë”.
Duke folur për blerjet e fundit mes të cilëve Hernanes dhe Lemnia, Allegri shprehet i kënaqur me integrimin e grupit.
“Blerjet e reja janë integruar mirë sepse kemi punuar shumë gjatë dy javëve të fundit. Kam të gjithë skuadrën në dispozicion përveç mesfushorit Khedira. Marchisio do të luajë që nga minuta e parë ndërsa për Moratan nuk kam vendosur ende. Në këtko momente duhet të mendojmë për Chievon dhe Manchester City-n”.
Tifozët nuk i kanë shijuar magjitë e Pogba në javët e para, por Allegri del në mbrojtje të mesfushorit francez.
“Është vetëm 22 vjeç dhe duhet të sillet si i tillë. Duhet të rikthehet të luajë ashtu siç ai di sepse askush nuk i kërkon të bëjë gjëra të mëdha”.
