Përfaqësuesi special i BE-së në Kosovë, Samuel Zhbogar thotë se tashmë gjithçka është kryer dhe shteti i ri duhet t’i thotë “po” Gjykatës Speciale, që pritet t’i hetojë disa ushtarë e prijës të UÇKse.
“Koha është tani që të vendoset për themelimin e Gjykatës Speciale. Amendamentet kushtetuese janë në Kuvend kurse ligji për të është gati. Nuk shohim arsye që ky votim të shtyhet”, thotë ai në intervistë për Klan Kosovën.
“Çdo ditë na pyesin nga kryeqytetet tona, se pse Specialja po vonon dhe ne duhet të shpjegojmë së është proces i vështirë. Sa më shumë zgjatet kjo aq më shumë pëson ky vend. Duke parë situatën besoj që deputetët shumë shpejt do e votojnë Gjykatën.
Por, diplomati slloven konfirmon se në këtë qëndrim evropianët janë në vijë të njëjtë me Shtetet e Bashkuara të Amerikës.
Veçse të parët, sipas tij, kanë edhe mënyra për të ndëshkuar Kosovën, nëse nuk e kryen këtë obligim.
“Nëse Kosova dështon t’i përmbush fjalët e dhëna që i ka ndaj nesh atherë kam frikë se disa shtete të BE-së do të pyesin se sa ky vend i plotëson detyrat dhe sa seriozisht e kupton rrugën drejt Europës”.
Zhbogar pranon se verdikti ndaj grupit të Drenicës i ka bërë disa deputetë që ta shohin Gjyaktën speciale me hezitim. Por, nuk i kupton ata që pranojnë ta lënë këtë punë në duar të OKB-së.
Në këtë intervistë Zhbogar, foli edhe për nevojën e demokratizimit të partive politike kosovare.
“Ne jemi për gjithpërfshirje dhe i mbështesim zërat e ndryshme në politikë duam zhvillim të demokracisë jo vetëm rreth partive por edhe brenda tyre. Presim që partitë politike t’i respektojnë këto rregulla”.
I pyetur konkretisht se a është demokratike rizgjedhja e Isa Mustafës si kryetar i LDK-së me procedurën e aklamacionit, përfaqësuesi i BE-së, tha se nuk e di se çfarë statuti dhe rregulla të brendshme ka kjo parti.
