Një emër që qëndron mes Anthony Joshuas dhe përballjes së shumëpritur gjithë-britanike me Tyson Furyn është Kristian Prenga.

Pak njerëz e kanë dëgjuar më parë emrin e boksierit shqiptar deri sot kur u bë e ditur se ai do të përballet me Joshuan këtë verë.

Të dy pritet të ndeshen më 25 korrik në Riad të Arabisë Saudite, në një event të “Esports World Cup”, i cili do të transmetohet live në DAZN, përcjell “Gazeta Express”.

Nëse Joshua arrin ta kalojë këtë “pengesë”, atëherë ai do ta sigurojë rrugën drejt një dueli të shumëpritur me Tyson Furyn, i cili përkohësisht është planifikuar për në nëntor.

Megjithatë, Prenga është i vendosur ta prishë këtë skenar.

“Anthony Joshua është një luftëtar i madh, por ai e ka bërë një llogaritje të tmerrshme dhe të gabuar duke më zgjedhur mua si kundërshtar.”

“Ky është lloji i meçit që ndryshon gjithçka në jetën time dhe të tij.”

“E di që ata kanë plane të mëdha pas këtij meçi.”

“E di që po më nënvlerësojnë. Jam i lumtur për këtë.”

“Do t’ua prish planet dhe do ta trondis botën këtë korrik në Arabinë Saudite.”

Prenga ka statistika impresionuese prej 20 fitoresh dhe 1 humbjeje, ku të gjitha fitoret i ka me nokaut.

Humbja e tij e vetme erdhi në vitin 2017, kur humbi me vendim unanim nga italiani Giovanni Auriemma.

Meçin e fundit Prenga e zhvilloi në shkurt, kur e nokautoi Joe Jones që në raundin e parë.

Prenga nuk renditet lartë në asnjë prej katër organizatave kryesore të boksit në kategorinë e peshave të rënda.

Megjithatë, ai ka mbajtur për pak kohë titullin e North American Boxing Association, pas një fitoreje me ndërprerje në raundin e tretë ndaj Samuel Crossed.

Edhe pse është lindur në Orosh të Shqipërisë, Prenga tani jeton në Edgewater, New Jersey, gjë që e bën të kualifikuar për tituj rajonalë.

Sipas BoxRec, ai renditet i dyti mes peshave të rënda aktive shqiptare, pas Nelson Hysës (24-0).

Prenga është zgjedhur me synimin për përgatitjen e Joshuas për duelin me Furyt.

Shqiptari është një boksier i gjatë dhe i vështirë për t’u lexuar, me stil lëvizës që mund t’i shërbejë Joshuas si test para përballjes së madhe.

Me një gjatësi prej 1.96 metra, ai është rreth 10 cm më i shkurtër se Fury, por e përdor mirë gjatësinë dhe distancën përmes “jab”-it.

Ai përdor shpesh goditje të tipit “uppercut” dhe “bolo punches”, njësoj si Fury, dhe është i mirë në goditjet në trup.

Dora e tij e djathtë e drejtpërdrejtë dhe “hook”-u i majtë në trup i kanë mbyllur shumicën e meçeve me nokaut.