Ka përfunduar seanca e jashtëzakonshme, të cilës, kryeparlamentarja Albulena Haxhiu i është referuar si “diskutim” lidhur me këtë temë.

Opozita e ka bojkotuar këtë seancë, ndaj në sallë ishin veç Lëvizja Vetëvendosje.

Gjatë fjalës së tij, kryeministri Kurti tha se i ka ofruar opozitën që ta ketë “Presidentin e vet”.

Ndërsa përmendi kërkesën ndaj PDK-së dhe LDK-së për t’i ofruar tre emra për pozitën e shefit të shtetit, Kurti tha gjatë një fjalimi në Kuvend se do ta garantonin zgjedhjen e njërit prej tyre.

“Sot opozita ka mundur ta ketë Presidentin e vet. Ata tre emra, ne garantojmë zgjedhjen e njërit prej tyre. Por, u refuzua. Opozita ka refuzuar të ketë kandidat konsensual, jashtë skenës politike të deritashme, që e propozon vetë ajo”, tha ai në seancën e jashtëzakonshme që u thirr për “diskutim” për Presidentin.

Kurti tha se ata “nuk kanë qenë të interesuar”.

Të shtunën në mëngjes, LVV-ja kërkoi nga PDK-ja dhe LDK-ja tre emra për President, por pa përmendur aty mbështetjen e mundshme në Kuvend.

Në atë propozim, LVV përmendte vetëm nënshkrimet për t’i çuar kandidatët në Kuvend, por jo edhe garancën për zgjedhjen e njërit prej tyre.

“Këta tre kandidatë duhet të jenë figura unifikuese, me integritet të lartë qytetar e kombëtar, me kontribut të dëshmuar në jetën profesionale dhe shoqërore, dhe jashtë skenës aktuale politike. Për këta të tre do të siguroheshin së paku 90 nënshkrime të deputetëve të Kuvendit të Republikës së Kosovës. Me atë rast, paraprakisht do të tërhiqeshin nga kandidatura Zëvendës-kryeministri dhe Ministri i punëve të jashtme dhe diasporës Glauk Konjufca e deputetja Dr. Fatmire Mulhaxha-Kollçaku”, thuhej në propozimin e LVV-së të shtunën.

Sipas vendimit të Kushtetueses, ka afat vetëm deri nesër që të zgjidhet presidentit i ri, në të kundërtën vendi shkon në zgjedhje të reja.