Presidenti amerikan Donald Trump propozoi marrjen e pronësisë së Rripit të Gazës dhe rizhvillimin e tij, pasi paraprakisht deklaroi se palestinezët duhet të largohen nga rajoni.

“SHBA do të marrë Rripin e Gazës dhe ne gjithashtu do të bëjmë një punë me të”, tha Trump të martën gjatë një konference të përbashkët me kryeministrin izraelit Benjamin Netanyahu.

Trump i bëri komentet pas takimit me liderin izraelit në Shtëpinë e Bardhë. Netanyahu u përgjigj, duke thënë se idesë “ia vlen t’i kushtohet vëmendje”, raporton BBC.

Presidenti amerikan ka thënë më parë se vendet fqinje mund të pranojnë palestinezët e zhvendosur nga Gaza – një propozim që u refuzua nga vendet arabe.

I pyetur për idenë, Trump tha se ai parashikon “një pozicion afatgjatë pronësie”.

“Ne do ta zotërojmë atë dhe do të jemi përgjegjës për çmontimin e të gjitha bombave të rrezikshme të pashpërthyera dhe armëve të tjera në vend”, tha Trump.

Ai shtoi se “të gjithë e duan idenë” dhe se SHBA do të “krijojë një zhvillim ekonomik që do të ofrojë një numër të pakufizuar vendesh pune dhe strehimi për njerëzit e zonës.”

“Kjo mund të jetë Riviera e Lindjes së Mesme”, tha Trump.

Trump u pyet nga një gazetar nëse palestinezët që largohen nga Gaza do të lejohen të rivendosen atje në të ardhmen. “Kush e imagjinon të jetojë atje?” u pyet ai.

Presidenti amerikan u përgjigj: “Njerëzit që jetojnë atje. Njerëzit e botës”, duke shtuar se kjo do të përfshinte palestinezët.

Komentet tërhoqën kritika nga disa ligjvënës, të cilët hodhën poshtë nocionin e pronësisë së Gazës.