“Zonja e vjetër” ka vazhduar me fitore në rrugën drejt titullit duke mposhtur Fiorentinën me rezultat 3 me 2.
Gonzalo Rodriguez i Fiorentinës shënoi nga pika e bardhë në minutën e 33-të por ky gëzim zgjati vetëm tre minuta pasi Fernando Llorente barazoi për 1-1. Në sekondat e fundit të pjesës së parë, Carlos Tevez shënoi një gol duke kaluar në epërsi skuadrën e Massimiliano Allegrit.
Në pjesën e dytë Rodriguez pati rast të barazonte sërish rezultatin, por humbi penalltinë.
Në minutën e 70-të Carlos Tevez realizoi edhe një herë për të vulosur fitoren e skuadrës së tij ndërsa Josip Iliçiç ngushtoi diferencën me golin e shënuar në fund të ndeshjes.
Juventusi vazhdon të kryesojë në Serie A dhe në rast se fiton javën e ardhshme siguron titullin.
Pesë javë para përfundimit të kampionatit, Juventus ka 76 pikë, 14 më shumë se Lazio që e përcjell në pozitën e dytë.
