Barazimi ndaj Bate Borisov ka lënë pasojat e para te Partizani. Kapiteni, Bruno Telushi ka ndërprerë bashkëpunimin me kampionët e vendit, pasi ka kundërshtuar trajnerin, Zoran Zekiç pas duelit me bjellorusët.
“Partizani njofton mbylljen e bashkëpunimit me Bruno Telushin. Mesfushori dhe klubi kanë vendosur të ndërpresin me mirëkuptim kontratën mes tyre” thuhet mes të tjerash në njoftimin e klubit.
Burime pranë kampionëve të Shqipërisë bëjnë me dije se Telushi nuk e ka pritur aspak mirë aktivizimin nga stoli në këtë 90 minutësh, duke ngritur zërin ndaj trajnerit kroat.
Situatë që nuk është pëlqyer aspak nga stafi dhe drejtuesit e klubit, për të sjellë edhe këtë divorc të dytë me 32-vjeçarin.
Kjo mund të konsiderohet edhe një goditje para duelit të kthimit për Partizanin, që javën e ardhshme sfidon Bate Borisov në transfertë për të tentuar kalimin në turin e dytë kualifikues të Champions League.
Telushi luajti një rol të rëndësishëm në fitimin e titullit sezonin e shkuar, ku u aktivizua në 20 takime. Gjithsesi, tashmë i duhet të gjej një skuadër të re për sezonin e ri.
Klan News
