Numri i madh i azilkërkuesve kosovarë në Zvicër dhe në përgjithësi në vendet e Bashkimit Europian, ka alarmuar ligjvënësit e shtetit zviceran.
Deputeti Martin Naef i Partisë Socialdemokrate të Zvicrës ka bërë dorëzimin zyrtar të një interpelance për Kosovën në Parlamentin e Konfederatës së Zvicrës.
Kërkesa për interpelancë u referohet zhvillimeve më të reja në Kosovë dhe në të adresohen shumë probleme me të cilat përballet Kosova aktualisht.
Interpelanca e dorëzuar nga Naef titullohet, “Valë e re migrimi nga Kosova – çfarë duhet të bëjmë?”, raporton Albinfo.ch.
Në këtë interpelancë shprehet brengosja mbi eksodin e muajve të fundit nga Kosova drejt vendeve të perëndimit.
“Lajmi mbi numrin e madh të shtetasve të Kosovës, të cilët në ditët dhe javët e fundit janë duke lëshuar vendin e tyre në drejtim të Evropës perëndimore, preokupon njerëzit në Evropë dhe sfidon politikën e bashkësisë ndërkombëtare në Kosovë”, thuhet në hyrje të saj.
Ndërsa pasojnë një varg pyetjesh që deputeti Naef i drejton qeverisë së vendit të tij se: “Cilat janë shkaqet e kësaj vale të re eksodi nga Kosova? Sa njerëz jetojnë në varfëri në Kosovë, sa janë të papunë? Përse nuk ka përparime më të shpejta të zhvillimit ekonomik dhe të ndërtimit të autoriteteve ligjore shtetërore? A do të fillojë Qeveria Federale një proces të rishikimit dhe të riformulimit të politikës së saj ndaj këtij shteti të ri?, etj.
Më tutje, interpelanca bën fjalë për anëtarësimin e Kosovës në Fondi Monetar Ndërkombëtar (FMN) dhe suksesin ose dështimin e politikës së FMN-së në Kosovë, pastaj për privatizimin që, sipas tij, ka dalë i dështuar dhe “ka krijuar një terren pjellor për korrupsion dhe abuzim të pushtetit”.
Ndërsa tema më e mprehtë në raportet Zvicër-Kosovë, ndërprerja e marrëveshjes së sigurimeve shoqërore, bën po ashtu pjesë në këtë interpelancë: “A do të fuqizojë shpejtë Qeveria Federale përsëri Marrëveshjen për Sigurimet Shoqërore me Kosovën?”./Albinfo.ch/
