Në Gjermani, situata me mungesën e fuqisë punëtore të kualifikuar në tremujorin e parë të këtij viti është përkeqësuar më tej, sipas Institutit të Ekonomisë Gjermane (IW).
“Në muajin mars, numri i vendeve të punës të paplotësuara për të cilat punëdhënësit nuk mund të gjejnë fuqi punëtore të përshtatshme u rrit me 88 mijë dhe tani janë 558 mijë vende të lira të punës”, njoftoi Instituti Gjerman i Ekonomisë.
Mungesa e punëtorëve të kualifikuar, siç tregon më tej anketa, prek të gjitha segmentet e tregut të punës, por është veçanërisht e theksuar në fushën e shëndetësisë, mirëqenies sociale, arsimit dhe ndërtimit.
“Vetëm në sektorët e shëndetësisë, kujdesit social dhe arsimit, gjashtë nga dhjetë vende pune nuk janë plotësuar për shkak të mungesës së fuqisë punëtore adekuate”, tha IW, transmeton Telegrafi.
Në vitet e pandemisë 2020 dhe 2021, fluksi i fuqisë punëtore të kualifikuar nga jashtë u ngadalësua, por tendenca e rritjes së numrit të vendeve të punës të paplotësuara filloi shumë më herët. Një nga arsyet është tërheqja e një brezi të fortë numerikisht nga mesi i viteve pesëdhjetë.
Të shtunën u publikua informacioni i qeverisë federale, sipas të cilit numri i pensionistëve është në rritje vitet e fundit, d.m.th. personat që kanë mbushur moshën 67 vjeç dhe që janë ende aktivë në tregun e punës. Vitin e kaluar, 1.05 milion banorë mbi moshën 67 vjeçare ishin në një formë punësimi, një rritje e ndjeshme krahasuar me vitin 2010, kur vetëm 685 mijë pensionistë do të punonin ende në pension.
Pjesërisht, ky fenomen shoqërohet me mungesën e profesionistëve, prandaj punëdhënësit kthejnë shumë punëtorë të kualifikuar në punët e tyre të vjetra edhe pas daljes në pension.
Krahas importit të shtuar të ekspertëve nga vendet e Bashkimit Evropian, Gjermania ka lehtësuar procesin e marrjes së lejeve të punës dhe qëndrimit për banorët e vendeve jashtë BE-së. Kështu që nga viti 2016 është në fuqi një program për punësimin e punëtorëve nga Ballkani Perëndimor, i cili mundëson migrimin në tregun gjerman të punës.
Menjëherë pas fillimit të luftës në Ukrainë, punëdhënësit dhe sindikatat i kërkuan autoriteteve të heqin pengesat burokratike në mënyrë që të integrojnë sa më shpejt refugjatët nga Ukraina në tregun gjerman të punës.
