Kryetarja e Komunës së Gjakovës, Mimoza Kusari- Lila e cila po pretendon që të marrë edhe timonin e Aleancës Kosova e Re, e cila për disa vjet me radhë u udhëheq nga ana e Behgjet Pacollit, është ajo që i ka kontribuar shumë që kjo parti të mbetet jashtë Kuvendit.
Burime të Gazetës Blic brenda AKR-së kanë bërë të ditur se Kusari- Lila kishte insistuar me çdo kusht që të mos shkohet në koalicion parazgjedhor as me PDK-në e as me LDK-në.
“Kusari- Lila ka qenë kundër koalicionit parazgjedhor. Edhe pse ka qenë disponimi i shumicës së partisë që të shkohet në koalicion parazgjedhor, për faktin se e dinim fuqinë që e kishim si parti, zëvendëspresidentja e partisë ka këmbëngulur që të shkohet në zgjedhje vetëm”, tha ky burim.
Sipas këtij burimi, falë Mimoza Kusarit kjo parti sot është jashtë loje.
“Nuk i dijmë arsyet për këtë insistim të saj, mirëpo ky veprim i partisë për të garuar vetë, ka dëshmuar se ka qenë një gabim i pafalshëm”, thotë ky burim.
Lideri aktual, Behgjet Pacolli ka paralajmëruar se shumë shpejt do të largohet nga drejtimi i partisë, derisa sipas të gjitha gjasave ajo do të vij në krye të partisë.
Burime të Gazetës Blic kanë thënë se Kusari- Lila tashmë e ka edhe strategjinë se si ta drejtoj partinë dhe se si do të garoj në zgjedhjet e përgjithshme.
“Në zgjedhjet e ardhshme ajo nuk do të garoj sikurse në zgjedhjet e fundit. Ajo është në negociata me PDK-në që kurdo që mbahen zgjedhjet, të shkojnë në koalicion parazgjedhor”, tha ky burim.
Ndërkohë, Gazeta Blic ka provuar që të kontaktoj me zyrtarët e AKR-së për këtë çështje, mirëpo askush nuk ka pranuar që të flas rreth kësaj çështje.
Zëvendëspresidentja e AKR-së, Mimoza Kusari- Lila gjatë ditës së djeshme e ka pritur njeriun e dytë të PDK-së, Kadri Veselin. Kusari- Lila pos që e ka vlerësuar lartë këtë vizitë të Veselit në komunën e Gjakovës, ajo është kujdesur që t’ia bëjë edhe një befasi. Ajo e ka takuar Veselin me mësuesen e tij.
Mimoza Kusari- Lila ka qenë edhe zëvendëse e Hashim Thaçit, gjatë qeverisjes Thaçi 2./ Gazeta Blic

Gazeta online “InfoSot” shpall konkurs për gazetar/e

Artikull i sponzorizuar