Presidentja e Asamblesë Parlamentare të Këshillit të Evropës (APKE), Anne Brasseur, tha të martën në Beograd se Kosova ende nuk ka aplikuar për anëtarësim në këtë organizatë, raporton agjencia e lajmeve Tanjug.
Aplikimi i Kosovës për t’u anëtarësuar në Këshillin e Evropës është përmendur shpesh nga institucionet e Kosovës, ndërsa zyrtarët në Strazburg lënë të kuptojnë se një aplikacion eventual do të shqyrtohet pozitivisht.
“Kosova ende nuk ka aplikuar për t’u anëtarësuar në Këshillin e Evropës (CoE) si një anëtare”, tha Anne Brasseur.
E pyetur për “shanset e Kosovës për t’u bërë anëtare e Këshillit të Evropës” në një konferencë shtypi pas fjalimit të saj në parlamentin e Serbisë, Brasseur u tha gazetarëve se “janë duke u përgatitur programe që kanë për qëllim mbrojtjen e të drejtave të njeriut dhe të demokracisë në Kosovë”.
“Këto programe janë duke u realizuar në bashkëpunim me Serbinë. Serbia i jep përkrahje të Këshillit të Evropës në këtë drejtim”, theksoi ajo.
Brasseur vuri në dukje rëndësinë e bashkëpunimit të vazhdueshëm dhe komunikimit ku opinionet nuk janë të imponuara mbi palët e përfshira.
“Ajo që ne duhet të bëjmë është t’u mundësojmë qytetarëve të Kosovës të përfitojnë nga të drejtat që rrjedhin nga Deklarata mbi të Drejtat e Njeriut. Në këtë moment, qytetarët e Kosovës nuk mund të përdorin Gjykatën e të Drejtave të Njeriut në Strasburg”, tha Brasseur.
Ndërsa në fjalën e saj në Kuvendin e Serbisë, presidentja e Asambles Parlamntare të Këshillit të Evropës përshëndeti “zhvillimin pozitiv në dialogun Beograd-Prishtinë”, duke shprehur besimin se do të bëhet progres edhe më i madh në të ardhmen. /kallxo.com/
