![Kur Pacolli i kishte miq Haradinajn e Krasniqin [foto]](https://infosot.com/wp-content/uploads/2015/03/pac-kupa425-660x375.jpg "Kur Pacolli i kishte miq Haradinajn e Krasniqin [foto]")
Presidenti në largim i Aleancës Kosova e Re, Behgjet Pacolli, pas njoftimit se do të shkyçet nga jeta politike, si duket ka nisur të ndjehet nostalgjik.
Së fundmi, ai ka postuar disa fotografi në Facebook me politikanët aktivë të Kosovës, me të cilët nuk është se ka pasur raporte të mira, së paku jo politike.
Mirëpo, ai thotë se politika ka bërë që raportet e tij me disa prej politikanëve të përkeqësohen.
“Duke shikuar në fotot e kohës kur s’isha në politikë, gjeta, pos tjerash edhe këtë foto me Ramushin. Me Ramushin kemi patur marrëdhënie shumë të mira, me të e me familjen e tij. Ramushi e ka një babë të mrekullueshëm që e kam vizituar në të gjitha kohërat. Politika, (ndoshta) apo njerëzit e tij (me siguri) i kanë dëmtuar marrëdhëniet tona. Kam shumë respekt për sakrificat e tij dhe familjes së tij”, ka thënë Pacolli.
Ndërkaq, në një fotografi tjetër të postuar me Jakup Krasniqin dhe me ish-bashkëshorten e tij, Ana Oxa, Pacolli ka treguar se fotoja është bërë më 1999 në Lugano.
“Duke shikuar në albumet e mia hasa në këtë foto. Me Jakup Krasniqin në vitin 1999 gjatë qëndrimit të tij si mysafir i imi në Lugano”, ka shkruar Pacolli.
Kujtojmë se Pacolli dhe Krasniqi kanë zhvilluar një luftë fjalësh rreth një vit më parë në lidhje me çështjen e zgjedhjes së Pacollit president dhe për shtëpinë e ish-kryeparlamentarit të Kosovës, Jakup Krasniqi.
Një komentues i ka shkruar një thënie të moçme, për të cilën ai është pajtuar.
“Sa pata qura e qurana, pata miq e jarana… po i bie”, ka shkruar komentuesi, ndërsa Pacolli ia ka kthyer: “Vërtetë”.
