Gjykata Supreme ka vendosur që ta dërgojë në Gjykatën Kushtetuese, prej nga ky institucion do ta bënte të qartë nëse dy anëtarët e KGJK-së, kryesuesi Enver Peci dhe anëtarja Valdete Daka, kanë të drejtë për mandat shtesë ose jo.
Kryetari i Gjykatës Supreme, Fejzullah Hasani, ka deklaruar se ka një tendencë të rritjes së numrit të lëndëve që kanë ardhur në gjykatë.
Ai këto komente i bëri në seancën e përgjithshme të Gjykatës Supreme, ku pikë e parë e rendit të ditës ka qenë raporti i punës për gjyqtarët, me ç’rast kryetari Hasani ka sqaruar numrin e lëndëve për muajin shkurt, për secilin prej tyre.
Ndërkaq, në diskutim është ngritur edhe çështja e mandatit të dy anëtarëve të Këshillit Gjyqësor, të deleguar nga Gjykata Supreme, për të cilët Këshilli Gjyqësor ka nxjerr një vendim që ua njeh mandatin shtesë një vjeçar, pas skadimit të mandatit të rregullt pesë vjeçar.
Kryetari Hasani ka kërkuar që kjo çështje të hidhet në votim për të vendosur nëse gjyqtarët janë dakord që t’i drejtohet Gjykatës Kushtetuese, prej nga ky institucion do ta bënte të qartë nëse dy anëtarët e KGJK-së, kryesuesi Enver Peci dhe anëtarja Valdete Daka, kanë të drejtë për mandat shtesë ose jo.
“Janë shfuqizuar ligjet që kanë të bëjnë me pavarësinë e mbikëqyrur, përfshirë edhe nenin 151, në të cilin po aludohet. Është shumë e qartë, si në aspektin kushtetues po ashtu edhe në atë ligjor”, ka theksuar kreu i Supremes, duke shtuar se për të mos ardhur në situata të palakueshme, Gjykata Supreme do t’i fillojë procedurat e delegimit të çështjes në Gjykatë Kushtetuese.
Ndryshe, në seancë u diskutua edhe për grevën e gjyqtarëve të gjykatave themelore, ku u debatua gjatë rreth gjendjes dhe ndryshimeve në disfavor të tyre, që kanë ndodhur gjatë transferimit të gjyqtarëve nga një nivel gjykate në një tjetër, me rastin e reformave në gjyqësor, në segmentin e pagave.
