Ministria e Punëve të Brendshme, që është ndër dikasterët më të rëndësishëm të qeverisjes në vend, po drejtohet nga njerëz që s’kanë lidhje me fushën e sigurisë.
Përpos ministrit Skënder Hyseni, i cili s’ka lidhje me fushën e sigurisë, edhe të gjithë këshilltarët e tij vijnë nga fusha tjera të jetës.
Skender Hyseni, është me background nga letërsia angleze. Ai për një kohë të gjatë ka qenë përkthyes i ish- presidentit, Ibrahim Rugova, ndërkaq, gjatë qeverisjes PDK- LDK, 2007- 2010, ai ishte ministër i Kulturës dhe i Punëve të Jashtme.
Gazeta Blic merr vesh se asnjë nga këshilltarët e tij nuk vjen nga fusha e sigurisë.
KëshilltarI i Hysenit, Agim Gashi, vjen nga fusha e gjuhës dhe e letërsisë. Ai i ka përfunduar studimet nga gjuha shqipe. Gashi ishte drejtor i shërbimeve publike në Komunën e Prishtinës, derisa Kryeqytetin e udhëhiqte Isa Mustafa. Në profilin e Gashit në Facebook, figuron që ai pos postin e këshilltarit, në të njëjtën kohë mban edhe postin e asamblistit në Kuvendin Komunal të Prishtinës. Agim Gashi është edhe kryetar i Degës së V të LDK-së në Prishtinë.
Edhe këshilltarja tjetër, Shqipe Mjekiqi nuk ka lidhje me sektorin e sigurisë. Ajo ka përfunduar studimet në shkenca politike dhe në marrëdhënie ndërkombëtare. Mjekiqi, gjatë kohës sa Fatmir Sejdiu ishte president i vendit, kishte qenë këshilltare e tij.
As Shkodran Manaj nuk vjen nga fusha e sigurisë. Ai ka përfunduar fakultetin juridik. Manaj pos postit të këshilltarit politik, në profilin e tij zyrtar në Facebook, atij i figuron edhe si udhëheqës i Divizionit për hartimin dhe harmonizimin e legjislacionit në MPB.
Këshilltarja tjetër, Filloreta Gashi vjen nga fusha e integrimeve evropiane.
Ndërkaq, i vetmi këshilltar, i cili deri diku mund t’i plotësoj për së afërmi kushtet për të qenë këshilltarë, është Ismet Zymeri, ish-drejtor i Toiforit. Në profilin e tij në Facebook, shkruan se ai ka përfunduar studimet në shkencat e kriminalistikës në Sarajevë.
Ministria e Punëve të Brendshme, është pa dyshim ndër ministrinë që përpos që ka numrin më të madh të punjonësve, është ndër ministritë më të ndjeshme./ Gazeta Blic
