Kryetari i Lidhjes Demokratike të Kosovës, Lumir Abdixhiku, pas takimit me kryeministrin në detyrë, Albin Kurti, tha se para se të diskutohen emrat konkretë për presidentin e ardhshëm të Kosovës, duhet të ketë dakordësi politike, raporton Ekonomia Online.
Abdixhiku tha se konsultimet duhet të zhvillohen para vendimmarrjes dhe se, para se një emër të bëhet publik, duhet të konsultohen edhe individët që mund të jenë kandidatë për këtë pozitë.
“Më mirë të dëgjojmë se si do të vijmë me emra konkretë në takimet e ardhshme, por që në fund të ketë një emër, se president mund të ketë vetëm një. Dhe përpara se të flasim për emra, atëherë duhet të kemi konsultime, jo vendime. Sepse vendimet duhet të merren pasi të ketë dakordësi politike për një emër të caktuar.
Se për çfarë do të kemi konsultime? Nuk mund të merren vendime për një emër, e më pas t’ia vendosim para aktit të kryer atij emri apo t’i themi se ti je kandidati, për të cilin jemi të interesuar. Pra, fillimisht duhet të ketë dakordësi politike, e më pas duhet të ketë vendime individuale.
Por ju lutem që të keni pak mirëkuptim, sepse s’mund të flasim për emra konkretë, eventualisht t’ju dimë për emra konkretë, sepse para se të flasim për emra publikisht, duhet të flasim me individë të caktuar se a mund ta ushtrojnë këtë detyrë ose a do ta ushtrojnë këtë detyrë. Prandaj nuk është kaq e thjeshtë.
Ajo që është e rëndësishme ta kuptojmë është se po mundohemi të gjejmë një zgjidhje të qëndrueshme për Republikën e Kosovës. Per ne, për LDK-në, është shumë e rëndësishme që këtë zgjidhje dhe këtë e drejtë presidentit apo presidentes së ardhshme që e mbron Republikën e Kosovës dhe LDK-ja gjithmonë Kosovës i ka dhanë presidentë të jashtëzakonshëm dhe LDK-ja tani po e merr këtë përgjegjësi”, tha Abdixhiku.
