Presidenti i AKR-së, Behgjet Pacolli ka paralajmëruar kthimin e partisë së tij në skenën politike dhe këtë ai thotë se do ta bëjë si subjekt i vetëm politik, pa lidhur koalicion me askënd.
Në një intervistë për Kohavisionin, Pacolli ka deklaruar se u tradhtua nga njerëzit, të cilëve u besoi, duke i futur në strukturat më të larta të partisë.
Në mesin e atyre që e shfrytëzuan atë dhe AKR-në nuk e fut Mimoza Kusari Lilën, por thotë se ai do të jetë në krye të ndryshimeve të subjektit të tij, i cili megjithatë do të ruajë konceptin e partisë liberale, raporton KTV.
Behgjet Pacolli, i cili për pak ditë ishte në krye të shtetit, ka dërguar në Kushtetuese memorandumin e nënshkruar në prillin e 2011-ës mes tij, Hashim Thaçit e Isa Mustafës, pasi ai pretendon se ajo marrëveshje u shkel për faktin se nuk u zbatua pika në të cilën udhëzoheshin komisionet për ndryshimet kushtetuese, që zgjedhja e Presidentit të bëhej përmes votës së popullit.
Ndonëse ai nuk ka precizuar nëse do të kandidojë për president të vendit, por thotë se shteti nuk do të dalë nga kriza pa u larguar ky post nga kalkulimet politike që bëhen mes partive fituese të zgjedhjeve.
Pacolli, i cili u rrëzua nga posti i presidentit në kohën kur Enver Hasani ishte në krye të Gjykatës Kushtetuese, thotë se shkarkimi i tij ishte pasojë e ndikimit direkt të Hasanit te gjyqtarët vendorë.
Ndikimin e Hasanit ai e lidh me vizitat e shpeshta që në atë kohë ish kreu i kushtetueses ua kishte bërë qeverisë dhe ambasadave të shteteve të Kuintit në Kosovë.
Për kreun e AKR-së, qytetarët e Kosovës kanë mbetur në një udhëkryq, pasi u dëshmua se nuk ka pozitë e as opozitë të mirëfilltë, transmeton Koha.net.
Dështimet në aspektin e njohjeve për Republikën e Kosovës ia atribuon shefit të diplomacisë, Hashim Thaçi, pasi sipas tij, gjatë kohës sa ai lobonte, arriti t’i sjellë Kosovës rreth 40 njohje e për këtë mandat Thaçi ka siguruar vetëm 1 njohje e gjysmë.
© KOHA. Të gjitha të drejtat janë të rezervuara.
