Nesër bëhet aplikimi për kodin telefonik të Kosovës. Këtë e kanë konfirmuar për Tribuna Channel Ministria e Punëve të Jashtme e Austrisë dhe Ministria për Dialog e Kosovës.
Drejtori për media në Ministrinë e Jashtme të Austrisë, Peter Guschelbauer thotë se ishte e paraparë që Unionit Ndërkombëtar të Telekomunikacionit t’i dërgohet letra për aplikim më 15 nëntor 2015.
“Ne do të kërkojmë ndarjen e një prej dy kodeve të pa alokuara +383 apo +384, për përdorim nga autoritetet e Kosovës. Afati fillestar për të dërguar këtë letër ishte planifikuar të bëhej më 15 nëntor 2015. Për shkak të vonesave në krijimin e kompanisë së telekomit, data e re në të cilën kemi ndërmend ta dërgojmë letrën tashmë është vendosur si 1 janari 2016”, ka thënë Guschelbauer.
Ndërsa shefja e zyrës për Media nga Unioni Ndërkombëtar i Telekomunikacionit, Sanja Achary, tha se në momentin që do të ndahet një kod për Kosovën, do të publikohet në ueb-faqen zyrtare të saj.
Aplikimin e ka konfirmuar edhe ministrja për Dialog, Edita Tahiri.
Pasi të ndodh ky proces, do të vazhdojnë zbatimet teknike të kalimit të tri kodeve që aktualisht përdoren në Kosovë +377, +389 dhe +381, në një kod unik.
