Komandanti i Forcës së Sigurisë së Kosovës(FSK), gjenerallejtënant Rrahman Rama u prit të hënën nga presidentja e vendit, Atifete Jahjaga.
Me gjeneral Ramën në takimin tek presidentja u pritën edhe tre oficerët e Forcës së Sigurisë, të cilët ditë më parë u diplomuan në Akademinë Ushtarake Mbretërore “Sundhurst” në Britaninë e Madhe, toger Fitore Fazliu dhe nëntogerët Ismail Hoxha dhe Besfort Kruma.
Me këtë rast, komandanti i FSK-së e njoftoi presidenten Jahjaga mbi rezultatet dhe punën e shkëlqyer që oficerët nga FSK-ja, përkatësisht Republika e Kosovës e kanë arritur gjatë studimeve një vjeçare në Akademinë Mbretërore ushtarake “Sundhurst” në Britaninë e Madhe.
Gjeneral Rama me këtë rast tha se është shumë krenar për përgatitjen profesionale, përkushtimin dhe disiplinën që oficerët po tregojnë në të gjitha shkollimet, trajnimet jashtë vendit e në veçanti siç u shpreh ai “shpallja e oficerit Ismail Hoxha si oficer kadeti më i suksesshëm nga të gjithë studentët internacional vijues të Akademisë Ushtarake të Britanisë së Madhe”.
E para e vendit, presidentja Jahjaga i ka shprehur komandantit të FSK-së mirënjohjen për punën dhe përkushtimin në ngritjen dhe avancimin e FSK-së e gjithashtu edhe për përkrahjen dhe mbështetjen që janë duke e gëzuar oficerët e rinj brenda Forcë së Sigurisë me synimin që FSK-ja të ngrihet edhe më tutje profesionalisht në të gjitha fushat.
Gjithashtu Presidentja i ka përgëzuar oficerë e rinj të FSK-së, për përfundimin me sukses të shkollimit në Akademinë ushtarake Mbretërore e në veçanti ka përgëzuar nëntoger Ismail Hoxha, oficer në Batalionin e Tretë për Reagim të Shpejtë në Istog, për suksesin e treguar në Akademi, me të cilin na bëre krenar të gjithë ne, përfundoi Jahjaga.
