Ministri për Kthim e Komunitete në Qeverinë e Kosovës Dalibor Jevtiq ka thënë se serbët në institucionet e Kosovës nuk do ta përkrahin formimin e Ushtrisë së Kosovës.
“Ne për këtë temë kemi folur disa herë dhe kemi theksuar se ne nuk do ta përkrahim asnjë iniciativë të tillë. Po të kishim qenë të gatshëm të përkrahnim këtë iniciativë, kjo tashmë do të ishte vënë në rendin e ditës të Kuvendit të Kosovës”, ka thënë Jevtiq në një intervistë për TV Herc të Shtërpcës, transmeton Koha.net.
“Konsiderojmë, ka thënë ai, se disa tema janë më të rëndësishme sesa formimi i Ushtrisë së Kosovës dhe mendoj se shoqëria kosovare duhet të merret me çështjen ekonomike dhe me gjithë atë që i mundon qytetarët e Kosovës”.
Jevtiq ka thënë se për këtë çështje nuk flet askush nga serbët në Qeverinë e Kosovës dhe se kjo nuk është prioritet për serbët, dhe ne, ka shtuar, kemi thënë se përgjithësisht nuk mund ta përkrahim këtë iniciativë.
“Kjo është gjëja e fundit që kemi thënë ne për idenë e formimit të ushtrisë së Kosovës”, ka theksuar Jevtiq.
Ai ka folur edhe për formimin r Asociacionit të Komunave serbe duke theksuar se formimin e tij pret në gjysmën e parë të vitit që vjen.
Jevtiq mendon se në vitin 2016 nuk do të ketë zgjedhje në Kosovë.
