Samsung do të prezantojë së shpejti Galaxy S7, edhe pse pjesa më e madhe e veçorive të tij janë zbuluar tashmë. Së fundmi janë zbuluar edhe çmimi i telefonit dhe data kur do të dalë në treg. Sipas një informacioni të zbuluar aksidentalisht nga një dyqan kinez, telefoni inteligjent i ardhshëm i Samsung-ut do të kushtojë më lirë se Galaxy S6. Ky telefon inteligjent do të kushtojë rreth 463 dollarë. Duke pasur parasysh se Galaxy S6 është shitur për 725 dollarë në fillim, Galaxy S7 na duket shumë i lirë.
Samsung nuk ka pasur edhe aq shumë sukses në shitjen e pajisjeve të saj, pavarësisht specifikave shumë të mira. Në fillim të këtij viti, kompania vendosi që të ulë çmimet e telefonave për të shitur më shumë pajisje.
Pavarësisht çmimit më të ulët, Galaxy S7 do të ketë veçori më të mira se paraardhësi i tij. Një ndër këto veçori është skaneri për irisin e syrit.
Ndërkohë, i njëjti burim nga Kina konfirmon se Galaxy S7 do të prezantohet gjatë Kongresit Botëror të telefonave, që zhvillohet në muajin shkurt, dhe do të dalë treg në muajin mars.
