Gjykata Kushtetuese pritet që nesër të shpallë vendimin për Asociacionin e Komunave Serbe në Kosovë.
Burime të Gazetës Express tregojnë se nesër pritet të shpallet vendimi i Gjykatës Kushtetuese për Asociacionin e Komunave Serbe në Kosovë, lëndë këtë të cilën në Kushtetuese e kishte dërguar Presidentja e Kosovës, Atifete Jahjaga.
Jahjaga kishte marrë vendim kohë më parë që Asociacionin ta dërgonte në Kushtetuese, në mënyrë që të shihet përputhshmëria e parimeve të Asociacionit me Kushtetutën e Republikës së Kosovës.
Se cilët do të jenë hapat e mëtutjeshëm pas këtij vendimi, deri tani Qeveria ka bërë të qartë se do ta respektojë vendimin cilido që të jetë ai.
Kryeministri Isa Mustafa kishte deklaruar se do do ta respektojnë vendimin e Gjykatës Kushtetuese në lidhje me çështjen e Asociacionit, pasi që, siç ka thënë ai kjo gjykatë është arbitri kryesor për të konstatuar nëse AKS’ja është apo jo në përputhshmëri me kushtetutën.
