Rekomandimi pozitiv për heqjen e vizave, shumë i pritur nga qeveria, mbetet peng i dy problemeve: mosdënimi i zyrtarëve të lartë për korrupsion dhe fluksi i emigrantëve të vitit të kaluar, raporton KTV.
Analistë dhe njohës të këtyre proceseve shprehen se Kosova ka bërë më se mjaftueshëm në plotësimin e kritereve teknike.
Por Besa Shahini, një prej problemeve që e potencon, është edhe ai i fluksit të emigrantëve të vitit të kaluar. Por siç edhe ka raportuar KTV-ja e Koha Ditore, bazuar në burimet e saj, një gjë që nuk ka ndodhur dhe që pritet nga BE-ja, është dënimi i zyrtarëve të profilit të lartë për krim të organizuar e korrupsion.
Si kryeministri Isa Mustafa, ashtu edhe Ministri për Integrim Evropian, Bekim Çollaku, kanë shprehur besimin për liberalizimin e vizave në vitin e ardhshëm dhe plotësim të kritereve.
Megjithatë, në raportin e Komisionit Evropian që pritet të dalë pas 15 dhjetorit, pritet të theksohet se “Kosova është arsyeshmërisht afër plotësimit të kritereve, por nuk i ka përmbushur plotësisht ato”, për çka edhe nuk pritet rekomandim pozitiv.
