Ka 5 vjet që Ilaz Abdullahu jeton vetëm me djalin e tij, Fatmirin, në një dhomë të vjetër, në mëshirë të fatit dhe njerëzve të vullnetit të mirë.
Atij, pos për mbijetesë, i duhet edhe të kujdeset për të birin e tij, i cili është invalid, raporton KTV.
Abdullahu jeton në fshatin Merdar të Podujevës dhe, sipas tij, ndihma sociale prej 70 eurosh nuk i mjafton. Thotë se komuna është në dijeni për gjendjen e tyre ekonomike, mirëpo nuk ka ndërmarrë asgjë.
Ai madje thotë se s’ka mundësi as të shkojë në komunë për të kërkuar ndihmë, pasi që nuk mund ta lërë djalin vetëm.
Edhe pse zyrtarët komunalë janë të informuar për gjendjen e familjes Abdullahu, ata thonë që pa bërë kërkesë nuk mund t’iu ndihmojnë, transmeton Koha.net.
Përfaqësuesi i fshatit, Xhevdet Sadiku, thotë se ka edhe shumë raste të tjera në gjendje të rëndë ekonomike, mirëpo komuna nuk ndërmerr asgjë.
