Fakti se kapitulli i parë të cilin Serbia do ta hapë me BE-në është i ndërlidhur me Kosovën, nuk do të thotë se anëtarësimi dhe dialogu me Prishtinën duhet të përzihen, thotë Marko Gjuriq.
Në konstatimin se Brukseli këtë tashmë e ka përzier, shefi i Zyrës për Kosovën, për B92 ka thënë se është bindje e gabuar se për Beogradin negociatat me Prishtinën janë të rëndësishme vetëm për anëtarësimin e tij në Bashkimin Evropian.
“Jo, ato,janë të rëndësishme për stabilitetin e brendshëm, për stabilitetin në vetë krahinën jugore, por edhe për pozitën njerëzve tanë në Kosovë”, ka thënë Gjuriq, transmeton Koha.net.
Në pyetjen se si do të rrjedhin bisedat rreth kapitullit 35 meqë dialogu është i bllokuar, Gjuriq është përgjigjur:
“Kapitulli 35 nuk do të duhej të shërbente si zëvendësim për dialogun Beograd- Prishtinë, por si diçka për verifikim të asaj që arrihet në dialog. Nëse nuk arrihet asgjë, atëherë nuk ka se çfarë të verifikohet”, ka thënë Gjuriq dhe ka shtuar se klima e përgjithshme në Kosovë ndryshon përmes dialogut në Bruksel qëllimi kryesor i të cilit është stabiliteti, por, ka shtuar, se pala tjetër nuk po e bën punën e vet.
“Tash e tri vjet po përsërisim se politikanët shqiptarë nuk po u qasen në mënyrë konstruktive negociatave, sepse në to janë vetëm pse i ka detyruar bashkësia ndërkombëtare dhe për shkak se përmes pranisë së Brukselit sigurojnë pozicione”, ka thënë Gjuriq, i cili, ka akuzuar se “pas sulmeve kundër serbëve në Prishtinë fokusi është orientuar në anën e gabuar.
“Në vend se fokusi në Prishtinë të jetë te sulmet, në medie po flitet se incidentet janë inskenuar, se pas tyre qëndrojnë shërbimet serbe ose vetë serbët e Gorazhdecit. Është e qartë se kjo s’është e vërtetë, fjala është për ekstremizëm e ne konsiderojmë se bëhet fjalë për terrorizëm”, ka thënë Gjuriq.
