Ambasadori rus në Shqipëri, Alexander Karpushin, ka folur për rrëzimin e avionit rus dhe marrëdhëniet me Turqinë. Duke folur për emisionin “Diplomaticus”, ambasadori Karpushin tha se kjo ishte një pabesi, ndërsa e cilëson rrëzimin e avionit si “thikë pas shpine”.
Por ambasadori rus në vendin tonë sqaron se nuk do të ketë luftë me Turqinë, por përmend masat e marra për raportet mes dy vendeve pas kësaj ngjarje.
“Pavarësisht përmasave të dukshme të këtij problemi, nuk kemi parë sulme ndaj cisternave nga ana e koalicionit. Ky koalicion ka një vit e gjysmë në Siri që gjoja lufton kundër ISIS por, cisternat e autokolonave mbeten të paprekshme. Forcat Ajrore të Rusisë nuk kanë ndërmend të dobësojnë sulmet e tyre ndaj ISIS, ftoj të gjitha shtetet e tjera që t’i bashkohen kësaj nisme”, ka thënë Ambasadori rus.
“Ky akt është marrë nga një shtet që ka interesa në rajon. Turqia nuk ka ndërmarrë asnjë akt drejt zbutjes së tensioneve. Ankaraja nuk ka tentuar të na njoftojë urgjentisht për këtë ngjarje. Por Turqia thirri një mbledhje të jashtëzakonshme të NATO-s. Nuk kemi marrë asnjë ngushëllim nga Turqia deri më tani, dhe nuk na është kërkuar falje. Arroganca e liderëve turq nuk e qetëson aspak situatën dhe zemërimin e Rusisë. Ankaraja nuk ka paraqitur propozimet e saj për dëmshpërblim dhe ndëshkimin e fajtorëve për vrasjen e pilotit. Vetëm nëse kërkohet falje mund të normalizohen marrëdhëniet tona”, u shpreh ambasadori Karpushin, raporton BW.
Ndërkaq, në Rusi u thirr për sqarim atasheu turk në Moskë.
“Janë marrë masa diplomatike. Ministri i Jashtëm rus, përmendi praninë turke në tregtimin e paligjshëm të naftës. Për implikimin e Turqisë në këto skema ka folur edhe presidenti rus Putin”, tha ambasadori Karpushin.
