Lojrat Olimpike Tokyo 2020 mund të vinë me 5 sporte të reja. Japonia shteti organizator i eventit i ka propozuar komitetit olimpik ndërkombëtar t’i shtojë olimpiadës që do të zhvillohet pas 5 viteve edhe 5 disiplina të reja sportive. Organizatorët e Lojrave verore Tokyo 2020 parashikojnë që t’i bashkangjisin programit olimpik sporte të tilla si Baseball-i dhe Softball-i që përfshihen në një disiplinë, karateja, skateboard-i, sërfi dhe alpinizmi. Gjithsesi një vendim të fundit përsa i përket kësaj cështjeje do të marrë komiteti olimpik ndërkombëtar në mbledhjen që do të ketë në Rio De Janeiro në Gusht të këtij viti me rastin e Lojrave Olimpike që do të zhvillohen vitin e ardhshëm në metropolin brazilian.
“Bëhet fjalë për disiplina tradicionale në Japoni dhe që përfshinë shumë edhe të rinjtë në këtë vend” – shpjegoi njëri nga organizatorët. Këta të fundit kërkonin të përfshinin në propozimin e tyre edhe sporte të tilla si Bowling, Squashi-i, dhe Wushu por më pas zgjodhën 5 disiplinat e sipërpërmendura. Nëse komiteti olimpik ndërkombëtar jep Ok-in për futjen e këtyre 5 sporteve të reja në Olimpiadë, Lojrave Olimpike Tokyo 2020-të do t’u shtoheshin edhe 18 evente të tjera në të cilët do të përfshiheshin plot 474 atletë.
Për baseball-in dhe softball-in, do të bëhej fjalë për një rikthim në olimpiadë pasi përvec se janë sporte shumë popullore në Japoni kanë qenë pjesë e lojrave olimpike nga 1996 në 2008-n. Ndërsa karateja, skateboard-i, alpinzmi dhe sërfi nëse pranohen do të bëjnë debutimin absolut në një Olimpiadë.
