Edhe java e dytë e shtatorit nuk ka sjellë ndonjë të re sa i përket procesit të verifikimit të statusit të dëshmorit, invalidit, veteranit, pjesëtarit apo të internuarit të Ushtrisë Çlirimtare të Kosovës.
Ndonëse premtimi i fundit ishte se deri në fund të gushtit do të publikohen listat përfundimtare, njohës të afërt me procesin thonë se nuk ka gjasa që kjo të ndodh, madje as që mund të përmendin ndonjë afat.
Xhavit Jashari , përfaqësues i organizatave të dala nga lufta e UÇK-së, ka pohuar për KosovaLive se një gjë e tillë duhet të ndodhë brenda shtatorit në të kundërtën do të organizojnë protesta.
“Ky proces duhet përfundojë brenda shtatorit në të kundërtën na detyrojnë që të marrim masa qoftë me protesta qoftë në mënyra tjera sepse është koha që veteranët ti gëzojnë te drejt e tyre. Është duke u punuar në shqyrtimin e ankesave, certifikatat i kanë marrë ato rastet që nuk kanë qenë kontestuese, shumica e ankesave nëpër zona janë kryer kështu që edhe udhëzimi administrativ nga Komisioni është përgatitë dhe po presim shumë shpejt gjatë këtyre ditëve sipas premtimeve që i ka dhënë edhe kryeministri në takim me Agim Çekun dhe Faik Fazliu që të lëshohet ky udhëzim dhe veteranët të aplikojnë për të drejtat e tyre”, theksoi Jashari.
Sipas tij, ky proces domosdoshmërish duhet të kryhet këtyre ditëve sepse është stërzgjatur shumë dhe veteranët janë lodhur nga pritja.
“Kërkesat e veteranëve janë të dinë se deri ka mbërri procesi dhe kur do të mund t’i gëzojnë të drejtat e tyre. Ne edhe në takimin e fundit ju kemi bërë presion që të ketë kërkesa të qarta dhe po besoj se kjo të përfundojë shpejt”, ka shtuar ai.
KosovaLive ka provuar të kontaktojë me kryetarin e Komisionit Qeveritar për njohjen dhe verifikimin e statusit të veteranëve, invalidëve, pjesëtarëve dhe të internuarve të UÇK-së, Agim Çeku dhe me udhëheqësin e Zyrës për veteranët e luftës së UÇK-së, në Zyrën e kryeministrit, Faik Fazliu për të kuptuar nëse ky proces do të mund të përfundojë brenda këtyre ditëve, mirëpo kontakti me ta ka qenë i pamundur.
Ndërkohë, Fazliu dy javë më parë ka deklaruar për KosovaLive se ankesat ende janë në proces të shqyrtimit duke mos qenë në gjendje të jep ndonjë datë se kur mund të përfundoj ky proces.
“Jemi në proces të shqyrtimit të ankesave. Besojmë që kjo do të përfundojë shpejt. Nuk kemi ndonjë datë të caktuar. Me rëndësi është që jemi në fund të procesit”, ka thënë Fazliu.
Në anën tjetër, veteranë të disa komunave si Hani i Elezit, Ferizajt, Vitisë dhe të Shtimes kanë paralajmëruar se nëse deri më 15 shtator nuk publikohen listat e veteranëve do të organizojnë demonstrata madje edhe do të bllokojnë rrugët magjistrale në shenjë pakënaqësie të zvarritjes së këtij procesi.
Rikujtojmë se ende nuk po zbatohet për të gjithë Ligji nr. 04/l -054 për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare të Kosovës i cili është miratuar me 8 dhjetor 2011, ndërsa në Gazetën Zyrtare, NR. 30, është shpallur me 31 dhjetor 2011.
Plotësime dhe ndryshime të këtij ligji u bënë në pranverën e vitit 2014 dhe atëherë u tha se ligji do të fillon të zbatohet nga 1 korriku i vitit 2014 premtim që nuk u zbatua, tani me arsyetimin se Komisioni qeveritar për verifikimin e statusit të dëshmorit, invalidit, veteranit, pjesëtarit apo të internuarit të UÇK-së nuk e ka përfunduar punën.
Komisionit qeveritar për njohjen dhe verifikimin e statusit të dëshmorit, invalidit, veteranit, pjesëtarit apo të internuarit të UÇK-së iu desh kohë e gjatë për publikimin e listave ndërkohë pas shpalljes së tyre vërshuan ankesat të cilat arritën në mbi 20 mijë, gati aq sa edhe u gjenden në ato lista/kosovalive/
