E fundit që e pësoi ishte Holanda. Tulipanët morën dy shuplaka që mund t’u kushtojnë mungesën në Euro 2016. Bëhet fjalë për Islandën, jo vetëm atë të futbollit por edhe të koshit. Vendi i vogël ishullor në kufirin mes Europës, Amerikës së Veriut dhe arktikut, po regjistron arritje të pabesueshme sportive në arenën ndërkombëtare. Në basketboll, ashtu si në futboll, Islanda po rezulton një surprizë vërtet e ëmbël pasi ka arritur të kualifikohet në fazën finale të europianit në të dyja disiplinat, madje aktualisht po garon mes më të mirëve të kontinentit në Eurobasket 2015, një eveniment që po transmetohet në paketën SuperSport. Barazimi në shtëpi me Kazakistanin i siguroi biletën e futbollit drejt Francës, duke realizuar një mrekulli pasi vetëm disa vite më parë, vendi ishullor renditej sistematikisht mes vazove të fundit dhe të parafundit në hedhjen e shortit.
Në vitet 90 një studim doli në përfundimin se alkooli dhe duhani po vriste rininë e vendit në atë periudhë dhe që prej asaj kohe, qeveritë ndërtuan strategji për të dalë nga rrethi vicioz, duke e kthyer vëmendjen masivisht nga sporti. Në vitin 2002 në gjithë ishullin kishte vetëm një fushë futbolli të mbuluar por tashmë nga largësia e 13 viteve janë 11 të tilla përveç dhjetra fushave të tjera me bar sintetik. Investimet në infrastrukturë janë shoqëruar edhe nga ndryshime të mëdha në kërkesat ndaj trajnerëve që duhet të zotërojnë liçensën UEFA B.
Në vend punojnë 700 trajnerë me këtë liçensë, ndërsa 200 prej tyre kanë edhe liçensën e kategorisë UEFA A. Të gjithë janë futur në skemën shtetërore të pagesave, madje edhe ata që punojnë në qyteza me 500 banorë. Deri në vitin 2008 gjithçka po ecte në drejtimin e duhur, por me krizën financiare shumë vende në sport u shkurtuan. Ky ishte momenti kur islandezët nxorrën në pah krenarinë e tyre sepse ata nuk u dorëzuan duke e vazhduar punën që tashmë po jep frytet e veta. Një vend me 330 mijë banorë dhe një ishull gati gati të pabanueshëm për shkak të të ftohtit polar, islandezët kanë ditur të luftojnë në sfidat e jetës së përditshme, por këtë herë ata i kanë kaluar kufijtë e vendit të tyre. Islanda është bërë realiteti më i ri i sportit europian.
