Fabio Coentrao zgjedh ta vazhdojë karrierën te Monaco, duke refuzuar ofertën e Interit. Real Madrid e transferoi mbrojtësin për një sezon në Principatë, në formë huazimi. Zyrtarizimi nga Monaco erdhi gjatë pasdites së të mërkurës. Paralelisht, lajmi u konfirmua edhe nga madrilenët, në faqen zyrtare në “Twitter”. “Reali dhe Monaco arritën marrëveshjen për kalimin e Fabio Coentrao-s te skuadra franceze deri më 30 qershor 2016″, shkruhej në njoftim.
Kalimi i portugezit nën urdhrat e trajnerit Jardim u realizua pas një intrige në merkato që përfshiu gjiganët e Ligës së Parë franceze. Fillimisht në garën për Coentrao ishte edhe Paris Saint Germain. Parizienët e braktisën këtë pistë, duke blerë nga Monaco Kurzawa-n për 25 milionë Euro. Dalja nga skena e kampionëve të Francës krijoi iluzionin te Interi se mund ta afronin Coentrao-n, një përforcim i kërkuar me ngulm nga tekniku Mancini për krahun e majtë të mbrojtjes.
Por, vetëm pak orë më pas, erdhi edhe zhgënjimi i madh për italianët. Portugezi i Real Madrid informoi drejtuesit e klubit zikaltër se pranoi ofertën e paraqitur nga Monaco. Sipas mediave spanjolle, Coentrao preferoi klubin e Principatës, pasi me Monaco ka shansin të luajnë në fazën e grupeve të Europa League.
