Kryesuesi i delegacionit të Kosovës për bisedime me Serbinë për sigurimet, Rrahim Pacolli, ka thënë se marrëveshja për policat është reciproke.
Në Interaktiv të KTV’së, ai ka sqaruar se pse kjo marrëveshje është reciproke sipas tij.
“Nuk ka kurfarë 40 euro, nuk ka asgjë me pagu që hyn në territorin e Serbisë që hin një vit me këtë polisën e verdhë”, thotë ai.
“Në territorin e Serbisë, 50 kilometra brenda Serbisë nëse ndodhë ndonjë aksident, sipas marrëveshjes polici duhet të jetë shqiptar”, ka thënë ai.
Sa u përket tabelave që duhet t’i vendosin kosovarët në Serbi, ai ka thënë se nuk ka njohuri nëse është arritur ndonjë marrëveshje në të kaluarën në lidhje me këtë, por se ai ka kërkuar sqarime.
Ndërkohë, më herët Pacolli edhe nëpërmjet Facebook’ut ka bërë një sqarim në lidhje me çështjen e marrëveshjes për sigurimet.
Komenti i plotë:
SQARIM:
Është krijuaj një keqkuptim në lidhje me atë se a duhet paguar shtese 40 Euro për të hyrë në Serbi apo jo, si nga Mediat ashtu edhe nga qytetaret e shumtë. Andaj për hirë të sqarimit të drejtë për opinionin dhe qartësimit të kësaj çështje ju informoj si më poshtë:
Polica e Sigurimit TPL Plus është policë e cila mbulon dëmet ndaj palëve të treta jashtë territorit të Kosovës si në Maqedoni, Shqipëri apo Serbi. Pra,është një lloj Kartoni i Gjelbër, por për dallim mbulon shumë meëpak territore.
Nga statistikat tona rezulton se një pjesë e madhe e personave të siguruar posedojnë edhe policë TPL Plus, që nënkupton se edhe para marrëveshjes me Serbinë, ka qenë obligative posedimi i TPL Plus-it për të udhëtuar drejt shteteve fqinje si psh. Maqedoni.
Pra, personat e siguruar që posedojnë policën TPL Plus, NUK kanë nevojë të paguajnë asgjë shtesë në lidhje me sigurimin e veturës për të hyrë në Serbi pasi që Polica e njejtë e mbulon edhe territorin e Serbisë.
Për ta përbledhur këtë dhe me shpresë se kam arritur të sqaroj situaten po e ripërsëris:
Marrëveshja me Serbinë nuk obligon qytetaret e Kosovës të paguajnë asgjë shtesë, me kusht që të kenë sigurim valid TPL Plus.
Në policën e sigurimit TPL Plus është shtuar edhe një territor i ri i mbulimit (Serbia) pa ndikuar absolutisht në çmimin e sigurimit dhe shpresoj se edhe shtete tjera fqinje do të shtohen shumë shpejtë në këtë Policë derisa të fillojmë me shitjen e Kartonit të Gjelbër.
