E përditshmja gjermane “Kicker” zbulon një prapaskenë interesante merkatoje që lidhet me të ardhmen e sulmuesit të Bayernit të Mynihut, Thomas Muller. Tashmë nuk është më një detaj i paditur që lojtari ka një simpatizant të veçantë në Angli, ai është trajneri i Manchester United, Luis Van Gaal, i cili arriti të bindte mesfushorin e bavarezëve, Bastian Schweinsteiger për të përqafuar projektin e tij në Premier League. Por nëse kthehemi pak më pas në kohë, trajneri holandez nisi një ofensivë larg syve mediatikë për t’u rrëmbyer kampionëve të Gjermanisë sulmuesin. Van Gaal e njeh mjaft mirë lojtarin pasi ai e ka drejtuar Bayernin për dy sezone dhe kërkoi me çdo kusht ta transferonte në “Old Trafford” edhe pse Muller rinovoi kontratën në fund të sezonit deri në vitin 2019.
Kampioni i botës është zëvendësuar plot 22 herë nga Guardiola gjatë ndeshjeve të vitit të shkuar dhe Van Gaal tentoi të përfitonte nga ky fakt, duke i premtuar një vend të qëndrueshëm në formacionin e tij. “Luis Van Gaal nuk heq dorë lehtë por për Thomas Muller nuk ka një çmim”, deklaron Rummenigge, duke tentuar të largojë hijet e dyshimit për të ardhmen e 25-vjeçarit. Gjithsesi, deri në mbylljen e tregut të shitblerjeve askush nuk mund të flasë me siguri për të ardhmen e lojtarit të lindur në Oberbayern pasi Manchester United i ofron dyfishin e pagës që ai përfiton në Bavari dhe një kontratë deri në vitin 2020 me “Djajtë e Kuq”. Në fund të shkrimit, “Kicker” shton se aktualisht sulmuesi nuk ka asnjë qëllim për t’u larguar nga Bayerni ku është rritur si lojtar, pavarësisht sinjaleve joshëse nga Premier League./ss/
