Një ankand i mirëfilltë rreth yllit 24-vjeçar të Wolfsburg, Kevin de Bruyne. Listës së klubeve të mëdha europiane, të cilat qëndrojnë në radhë për shërbimet e mesfushorit me tipare sulmuese, i është shtuar edhe Real Madrid.
Deri më tani, lojtari i përfaqësueses belge ka tërhequr vëmendjen e Bayern Munchen, Barcelonës dhe Manchester City, me anglezët që duken të favorizuar për ta afruar në ekip.
Kjo mbi të gjitha prej faktit që tabloidët anglezë flasin për një ofertë me vlerë 63 milionë Euro të “citizens”. Shifra ende jo-zyrtare është e parezistueshme.
Nëse oferta do të paraqitet në tryezën e bisedimeve, duket e vështirë që Wolfsburg ta refuzojë. Kjo bazuar edhe në fjalët e trajnerit Dieter Hecking.
“Pavarësisht vlerësimit që kam për Manchester City, mund të them se për Kevin janë interesuar edhe Real Madrid, Bayern Munchen dhe Barcelona. Largimi i tij nga skuadra do të realizohej vetëm përballë një oferte të jashtëzakonshme”, deklaroi tekniku i klubit të Bundesligës.
Në 51 ndeshje të luajtura gjatë sezonit të kaluar, De Bruyne realizoi 16 gola dhe mori pjesë në 28 aksione për gol të Wolfsburgut. Talenti belg ka kontratë me “Ujqërit” deri në vitin 2019.
