Tre gola në harkun e 40 minutave. Ajax i mjaftoi më pak se një pjesë loje për të siguruar një fitore të thjeshtë në fushën e AZ Alkmaar, në ndeshjen e parë sezonale në Eredivisie holandeze.
Anwar El Ghazi i dha avantazhin skuadrës nga Amsterdami vetëm pas 14 minutave lojë, pas harkimit të Mitchell Dijks.
Mesfushori i talentuar dyfishoi shifrat 7 minuta nga mbyllja e fraksionit të parë të sfidës. 20-vjeçari kërceu më lart se të tjerët, duke devijuar me kokë drejt rrjetës pasimin e Gudelj.
Përpara pushimit ndërmjet pjesëve kishte kohë edhe për golin e tretë të miqve me Rochet.
Me avantazhin e tre golave dhe suksesin të garantuar, trajneri De Boer i dha edhe Yaya Sanogo mundësinë për të debutuar në elitën e futbollit holandez.
Sulmuesi i afruar te Ajax në formë huazimi nga Arsenali nuk arriti ta shkruante emrin në listën e golashënuesve.
AZ Alkmaar nuk u dorëzua dhe 11 minuta nga mbyllja e kohës së rregullt tentoi të realizonte të paktën golin e nderit. Megjithatë, paraqitja e vendasve është e gjitha në tentativën jashtë kuadratit të Vincent Janssen.
Për Ajax suksesi vjen në një moment mjaft delikat, pas eliminimit të skuadrës nga Rapid Ëien në Champions League. Me fitoren 3-0, skuadra nga kryeqyteti ngjitet përkohësisht në krye të renditjes./ss/
