Fenerbahce i shtohet listës së pretendentëve për Xherdan Shaqirin. Lajmi konfirmohet në Turqi, nga e përdtishmja “Fanatik”. Sipas gazetës, pas përforcimeve me lojtar të nivelit botëror, si Robin van Persie dhe Nani, drejtuesit e klubit nga Stambolli kërkojnë edhe një tjetër yll.
Pavarësisht “bllokimit” të ditëve të fundit dhe spekulimeve se mund të qëndrojë te Interi, mesfushori mbetet kandidati kryesor për t’u larguar.
Madje, shqiptari me pasaportë zvicerane, cilësohet si një prej emrave që po bllokon merkaton e ekipit zikaltër.
Pista turke mund të jetë e pranueshme nga Shaqiri, sepse Fenerbahce luan në kualifikueset e Champions League dhe gjatë sezonit të ardhshëm e ka të garantuar pjesëmarrjen në sfidat ndërkombëtare.
Deri më tani, e ardhmja e 23-vjeçarit të lindur në Gjilan është lidhur me dy gjigandë të Bundesligës, Schalke dhe Bayer Leverkusen. Ofertat nuk ka munguar as nga Anglia, ku pas Stoke City erdhi edhe oferta me vlerë 15 milionë nga Evertoni.
Për të mposhtur konkurrencën, te Fenerbahce janë të gatshëm të paguajnë shifrën e 18 milionë eurove të pretenduar nga Interi. Vendimi është marrë pas mbledhjes së presidentit të klubit turk, Aziz Yildirim me stafin e tij.
Yildirim duket se i ka dhënë direktiva të qarta drejtorit sportiv të Fenerbahce-s, Giuliano Terraneo, të shfrytëzojë marrëdhëniet e mira me zikaltërit, në mënyrë që marrëveshja të arrihet sa më shpejt.
