Policia e Kosovës ka njoftuar se në pikë-kalime kufitare në Merdare dhe Dheu i Bardhë, që lidhin Republikën e Kosovës me Serbinë, sot janë krijuar kolona të gjata të automjeteve.
Sipas Policisë, deri në orën 13:00 në Merdare (Podujevë) në hyrje kolona është e gjatë rreth 3 – 4 km, ku pritjet janë 3 – 4 orë, ndërsa në dalje kolona është deri në 1 – 2 km, dhe pritjet zgjasin rreth 1 – 2 orë, varësisht prej frekuentimit të automjeteve.
Ndërsa, në pikë-kalimin kufitar tek Dheu i Bardhë (Gjilan), si në hyrje, ashtu edhe në dalje kolona është e gjatë rreth 2 – 3 km, dhe pritjet zgjasin rreth 2 – 3 orë.
Kurse në pikë-kalimin kufitar Mutivodë (drejtimi i fshatit Keçekollë) dhe pikë-kalimi kufitar Muqibabë –(Gjilan), në hyrje dhe në dalje nuk ka fare pritje të gjata, përveç pritjeve normale afërsisht deri në 10-20 minuta.
Policia e Kosovës thotë se me kohë ka shtuar numrin e personelit policor në pika kufitare me qëllim të aplikimit të punës së kontrollit kufitar të përshpejtuar, për ti shmangur pritjet e gjata dhe të ju mundësojë qytetarëve, bashkatdhetarëve tanë kalim më të shpejtë të kontrollit kufitar.
“Policia e Kosovës me qëllim të shmangies së pritjeve të gjata, njofton të gjithë qytetaret se, ata që mund të shfrytëzojnë pikë-kalime tjera kufitare ku nuk ka pritje apo ka më pak pritje, ti shfrytëzojnë ato pasi nuk ka kolona dhe pritje të gjata, duke përfshirë pikë kalimet-kufitare Mutivodë në drejtim të fshatit Keqekoll dhe Muqibabë – Gjilan pasi ku nuk ka pritje fare, apo pritjet janë më të shkurtra krahasuar me pikë kalimet kufitare Merdare dhe Dheu i Bardhë, të cilët janë më të frekuentuara. Vlen të potencohet se nga ana e zyrtarëve policor të Policisë së Kosovës, puna është duke u zhvilluar normalisht me kapacitete dhe intensitet të shtuar, mirëpo kolona-pritjet janë duke u shkaktuar si rezultat i fluksit të madh të automjeteve si dhe procedurave që aplikohen gjatë plotësimit të dokumenteve-formularëve për kalim kufitar” , thuhet në komunikatën e Policisë së Kosovës.
/BLIC/
