Zyra e BE-së në Kosovë njoftoi sot se Përfaqësuesi Special i BE-së në Kosovë, Samuel Zhbogar, ka takuar sot drejtorin e Agjencisë Kundër Korrupsionit në Kosovë, Hasan Preteni, për të diskutuar për punën që po bën kjo agjenci.
“Shefi i Zyrës së BE-së në Kosovë/Përfaqësuesi Special i BE-së, Samuel Zhbogar, dhe Drejtori i Agjencisë Kundër Korrupsionit në Kosovë, Hasan Preteni, u takuan sot për të diskutuar punën e rëndësishme që po e bën Agjencia në luftimin e korrupsionit”, thuhet në komunikatë.
Sipas komunikatës, Preteni informoi Zhbogarin për opinion e Agjencisë, duke theksuar emërimet në nëntë bordet të cilat janë joligjore sipas Ligjit për Ndërmarrjet Publike.
Ndërkaq, Zhbogar mirëpriti këtë opinion dhe tha që BE-ja ndan të njëjtat shqetësime me Agjencinë. Ai shprehu besimin se Qeveria do ta marrë këtë opinion seriozisht dhe do të zbatojë rekomandimet që jepen aty, transmeton kp.
“Në përputhje me mandatin e tij, Bashkimi Evropian në Kosovë promovon emërimin e zyrtarëve shtetërorë në mënyrë transparente dhe të drejtë duke respektuar si duhet rregullat dhe procedurat ligjore”, thuhet në fund.
