Rektori i Universitetit të Prishtinës “Hasan Prishtina”, Ramadan Zejnullahu, ka reaguar ndaj letrës së disa senatorëve ku kërkohej shkarkimi i tij, duke thënë se Universiteti nuk guxon të jetë peng i grupeve që synojnë ta rrënojnë progresin në UP e ta vazhdojnë avazin e vjetër me të cilin promovohet injoranca e mashtrimi, duke dekurajuar dijen dhe të vërtetën.
Ai ka shkruar se avancimi akademik duhet të bëhet mbi bazë të meritave e jo mbi bazë të afërsive personale, partiake apo në bazë të korrupsionit.
Më poshtë mund të lexoni reagimin e plotë të rektorit Zejnullahu:
Unë e lexova me keqardhje letrën e senatorëve ku kërkohej shkarkimi im. Sikur të njëjtit të kishin punuar ose ta kishin ngritur zërin për ta mbrojtur UP-në sa herë që universiteti ynë sulmohet përmes korrupsionit, plagjiaturës e sjelljeve joetike, institucioni ynë do t’i kishte punët shumë mirë.
Ata nuk kishin kurajo të ballafaqohen me të ligat e universitetit e disa nganjëherë i kontribuonin aktivisht atyre.
Por, reagimi i tyre vije pikërisht kur në UP është filluar vendosja e rregullit dhe përjashtimi i të ligave.
Po e theksoj edhe një herë për komunitetin tonë akademik dhe publikun e gjerë se avancimi akademik duhet të bëhet mbi bazë të meritave e jo mbi bazë të afërsive personale, partiake apo në bazë të korrupsionit.
Nuk guxojmë që të abuzojmë me të hollat e qytetarëve të cilët na financojnë me bujari, përkundër faktit se ekonomikisht janë të varfër. Nuk guxojmë të abuzojmë me misionin dhe obligimet tona shkencore e profesionale përball një shoqërie demokratike në ndërtim.
Universiteti ynë nuk guxon të jetë peng i grupeve që synojnë ta rrënojnë progresin në UP e ta vazhdojnë avazin e vjetër me të cilin promovohet injoranca e mashtrimi e dekurajohet dija dhe e vërteta. Kjo e dëmton tërë sistemin e arsimit në Kosovë, i cili edhe ashtu ballafaqohet me kriza të thella qe një kohë.
