Bashkësia serbe në Kosovë mund ta krijojë edhe një komunë të re me shumicë serbe, të njëmbëdhjetën me radhë.
Nenad Rashiq, deputet i Listës Serbe në Kuvendin e Kosovës, ka konfirmuar për Rel se gjatë ditëve të fundit janë zhvilluar bisedime lidhur me këtë çështje.
Në këtë kontekst, katër fshatrat : Prilluzhë, Plemetin, Babin Most dhe Gracë, do të mund të formonin komunën e re. Këto fshatra aktualisht i takojnë komunës së Vushtrrisë dhe komunës së Obiliqit.
Megjithatë, Rashiq mohon se një gjë e tillë ka qenë kusht nga Lista Serbe për të dhënë mbështetjen e deputetëve të saj për zgjedhjen e Hashim Thaçit president i ri i Kosovës.
Sipas tij, kjo më shumë ishte një lloj kompromisi rreth kësaj, siç e ka quajtur, ideje të vjetër, e cila është ringjallur tash.
“Ditëve të fundit kemi intensifikuar disa kontakte dhe për shkak të një nisme të vendosur dhe të pjekur, kemi arritur deri aty që kjo nismë mund të jetë e realizueshme. Sipas procedurës, kjo fillimisht duhet të miratohet në qeveri si propozim e më pas edhe në Kuvend. Mendoj se kjo nuk do të duhej të paraqiste ndonjë problem, për shkak se fuqia politike nuk do të ndryshonte e as interesat e shumicës shqiptare nuk do të cenoheshin”, ka theksuar Rashiq..
Ai ka shtuar që në rast se ekziston vullneti i mirë, një gjë e tillë do të mund të realizohej deri në fund të këtij viti.
Se a kanë votuar ose jo dhjetë deputetët e Listës Serbe për Thaçin, kjo mbetet ende e panjohur, duke pasur parasysh që votimi ka qenë i fshehtë, por e sigurt është që prania e tyre në sallën e Kuvendit të Kosovës, e ka mundësuar kuorumin për zgjedhjen e Thaçit president të ri të Kosovës.
Një nga njohësit e zhvillimeve politike në Kosovë, Rangjel Nojkiq, vlerëson se në rast që zgjedhja e Thaçit ka kaluar pa ndonjë kusht apo marrëveshje, atëherë Lista Serbe ka probleme të mëdha dhe do të ndëshkohet nga votuesit e saj.
“Do të ishte krejtësisht e papranueshme në rast se nuk janë marrë vesh dhe që pa ndonjë kusht kanë marrë pjesë në zgjedhjen e tij. Ajo komunë e re nuk është asgjë e re, sepse është nismë e mëhershme. Por, nëse ndodhë, gjithsesi që është hap pozitiv”.
“Prandaj, për këtë shkak, mendoj që serbët është dashur të kenë kushte mjaft të qarta dhe ato në fund t’ua dëshmojnë votuesve, gjegjësisht, popullit të vet, që ai ta di se cilat janë kushtet dhe pse u është dashur t’i japin votim e tyre Hashim Thaçit”, ka theksuar Nojkiq.
Ai ka shtuar se është e rëndësishme që për një kohë të shkurtë të zbatohet marrëveshja për Asociacionin e komunave me shumicë serbe, gjë që sipas tij është dashur të ndodhë deri më tash, por edhe marrëveshjet tjera si telekomi, etj.
Petar Miletiq, ish nënkryetar i Kuvendit të Kosovës, nuk pret shumë nga presidenti i ri i zgjedhur, Thaçi, kur bëhet fjalë për bashkësinë serbe. Kjo, sipas tij, para së gjithash, për shkak se funksioni i presidentit nuk ka mjaftueshëm pushtet ekzekutiv.
Ai, megjithatë, dyshon se Lista Serbe ka arritur ta imponoj agjendën e vet, “ashtu sikurse nuk ka pasur sukses as më herët, atëherë kur mbështetja e tyre në Kuvend ka qenë e nevojshme”.
Sipas tij, çështja e komunës së re, mund të jetë vetëm një dëshirë.
“Lista Serbe ia mundësoi zgjedhjen Thaçit. Se a kanë ndonjë marrëveshje apo jo, unë thjeshtë, dyshoj, duke pasur parasysh që i njoh mirë zhvillimet. Mbase, siç kanë thënë edhe ata vet, është për stabilizimin e zhvillimeve në Kosovë”.
“Në këtë moment, as ajo që është nënshkruar në Bruksel dhe që qëndron në dokumentet e Brukselit, madje as ajo në Kushtetutën apo ligjet e Kosovës, kur kjo nuk respektohet, kam frikë se kjo është vetëm ëndërr dhe nuk ndodhë diçka që nuk ekziston në letër”, ka thënë Miletiq.
Në Kosovë, tashmë ekzistojnë 10 komuna me shumicë serbe, prej të cilave 5 janë formuar me procesin e decentralizimit. Në pjesën veriore të lumit Ibër, janë 4 komuna, ndërkaq, 6 të tjera janë në pjesën jugore.
Pushteti i decentralizuar është krijuar në bazë të Dokumentit të Ahtisaarit, mbi bazën e të cilit edhe është shpallur pavarësia e Kosovës. /Bota sot/
