Kryetari i Lëvizjes Vetëvendosje, Visar Ymeri ka thënë se i tërë procesi i bisedimeve në Bruksel ka qenë i pabarabartë, rrjedhimisht i padrejtë, me karakter asimetrik ndaj Kosovës.
Përmes një postimin në profilin e tij zyrtar në rrjetin social “Facebook”, Ymeri ka thënë se “Zajednica”, nuk ka qenë OJQ as në marrëveshjen e prillit të vitit 2013.
Lexojeni të plotë postimin e Ymerit në Facebook:
“Prapë e njëjta metodë nga po e njëjta Qeveri sikur ajo e kaluara: koncesione të dëmshme e të rrezikshme ndaj Serbisë, gënjeshtër e mostransparencë për marrëveshjet, keqpërdorim flagrant e i turpshëm i parasë publike drejt rritjes së pronës private, keqpërdorim i aparatit shtetëror për heshtje të kritikës e protestës, shenjtërim i pronës së Liderit.
I tërë procesi i bisedimeve në Bruksel ka qenë i pabarabartë, rrjedhimisht i padrejtë, me karakter asimetrik ndaj Kosovës. Nuk ka se si të dal ky proces dialogu, i tillë çfarë është, në dobi të Kosovës. E aq më pak ta afirmojë shtetësinë e Kosovës.
Zajednica nuk ka qenë OJQ as në marrëveshjen e prillit të vitit 2013, e lëre më tash me këtë detajizim të kompetencave të saj. Në të vërtetë i tërë ky alarmim i përfaqësuesve të Qeverisë e të shërbyesve të pushtetit flet në vete për hapin e madh që sot Qeveria e Kosovës e bëri drejt bosnjëzimit të Kosovës.
Sa herë që bëhen koncesione të dëmshme dhe shtet-rrënuese ndaj Serbisë na del dikush nga aparati shtet-parti e flet për atë se si Kosova mund të bashkohet me Shqipërinë.
Zajednica në vete përbën kurorëzim të ndarjes së Kosovës në vija etnike. Kështu ajo o refuzohet në tërësinë e saj, me cilëndo formë që merr, ose pranohet si parim dhe praktikë e një Kosove pa republikë e pa perspektivë zhvillimi.
Qeveria e ka pranuar Zajednicën. Këta matrapazë negociatorë të udhëhequr nga kryematrapazi Isa Mustafa, janë ata që po e vjedhin pasurinë e qytetarëve për ta shndërruar atë herë në të mirë materiale të djemve e vëllezërve të tyre, e herë në pronë publike të strukturave ilegale të Serbisë.
Ne e refuzojmë atë në tërësinë e saj, edhe si parim edhe si praktikë, dhe do ta kundërshtojmë jetësimin e saj në secilin rast dhe secilën instancë” (sic.), ka shkruar Ymeri në Facebook.
