Trajneri i Arsenalit Arsene Wenger është optimist se skuadra që ai drejton i ka të gjitha mundësitë për të fituar titullin kampion në Premier League këtë sezon, por ndërkohë nga ana tjetër francezi paralajmëroi futbollistët e tij dhe tifozët e topcinjëve, se për momentin nuk kanë fituar ende asgjë. Pas përfundimit të fazës së parë Arsenali kryeson kampionatin anglez në kuotë të barabartë pikësh me surprizën Leicester City. Në kampin e Arsenalit janë të etur për të fituar një titull kampion që skuadrës londineze i mungon që nga viti 2004 dhe këtë gjë e di shumë mirë Arsene Wenger që prej pothuajse dy dekadash është në krye të topcinjëve.
” Unë jam shumë optimist përsa i përket shanseve që kemi për të fituar titullin. Megjithatë kemi ende shumë rrugë për të bërë, pasi për momentin jemi vetëm në gjysmën e saj. Të gjithë në klub duan të fitojnë por nuk kemi arritur ende asgjë. Duhet të tregojmë me paraqitjet tona në fushë se i kemi mundësitë për ta bërë dicka të tillë. Jemi të parët pas 19 javëve të para dhe po luftojmë me forcë për të ruajtur këtë pozicion. Nëse japim gjithcka në fushë unë jam i bindur se mund ta fitojmë titullin edhe pse mund të ketë edhe skuadra më të mira se ne”.
Pasi e mbylli vitin 2015-të me fitoren 2-0 ndaj Bournemouth, 2016-tën Arsenali do ta nisë me sfidën ndaj Newcastle-it që do të zhvillohet në datën 2 Janar në Emirates Stadium.
