Partia politike në opozitë, Lëvizja Vetëvendosje, përmes rrjetit social Facebook ka bërë të ditur se aktivistë të kësaj Lëvizjeje, “kanë shfryrë gomat e makinave zyrtare të qeverisë së Kosovës, në parkingun e kësaj qeverie ”, në Prishtinë.
“Policia po intervenon brutalisht, duke arrestuar dhe rrahur aktivistët”, thuhet në postimin e Vetëvendosjes.
Policia ka shpërndarë aktivistët dhe ka ndaluar disa prej tyre.
Zëdhënësi i policisë, Daut Hoxha, ka thënë për Radion Evropa e Lirë se aktivistët e Lëvizjes Vetëvendosje, “kanë hyrë më dhunë brenda oborrit të objektit të ish –Rilindjes, dhe kanë dëmtuar disa vetura zyrtare”.
“Policia e Kosovës po merr veprimet e nevojshme ligjore për të menaxhuar më këtë situatë”, ka thënë Hoxha, duke shtuar se deri më tash janë dhjetëra të arrestuar.
Veprimi i sotëm i Lëvizjes Vetëvendosje është në frymën e aksioneve për të “defunksionalizuar qeverinë”, në shenjë kundërshtimi me marrëveshjen e arritur në Bruksel ndërmjet Kosovës dhe Serbisë, për themelimin e Asociacionit të komunave të banuara me shumicë serbe.
Marrëveshja është arritur më 25 gusht, me ndërmjetësimin e Bashkimit Evropian, në kuadër të bisedimeve për normalizimin e marrëdhënieve ndërmjet Kosovës dhe Serbisë.
Sipas marrëveshjes, serbët në veriun e Kosovës do të kenë më shumë te drejta dhe asociacioni i komunave do të ketë përgjegjësinë për disa fusha siç janë shëndetësia, arsimi, zhvillimi ekonomik e planifikimi urban e rural, si dhe do të ketë të drejtë të marrë fonde nga Beogradi.
VV e konsideron marrëveshjen si shkelje të sovranitetit dhe ndarjen të Kosovës. Të njejtin mendim e ndajnë edhe dy partitë tjera në opozitë, Aleanca për Ardhmërinë e Kosovës dhe Nisma për Kosovën.
