Vetëvendosje përmes një kumtese për medie i ka cilësuar të dëmshme shumë nga marrëveshjet Kosovë – Serbi. Ajo shton se veç kësaj, Serbia as që i respekton ato marrëveshje, transmeton Koha.net.
Vulat Doganore – nuk kanë simbole të Kosovës dhe nuk përmendet fjala Republikë;
Regjistrat Kadastral – Kosova i ka marr disa kopje nga Serbia, të cilat po i verifikon EULEX-i, dhe ende nuk ka mbaruar ky proces edhe pse marrëveshja është nga shtatori i vitit 2011;
Liria e Lëvizjes – Kjo marrëveshje më shumë po përdoret për ta shtuar trysninë ndaj kryetarit të Mitrovicës Agim Bahtiri, për t’i dhënë më shumë territor Mitrovicës së veriut, sesa po rezulton të jetë marrëveshje që siguron lirinë e lëvizjes. Në vend se të flitet për lirinë e lëvizjes mes dy shteteve, ne diskutojmë sot për lirinë e lëvizjes brenda territorit të Kosovës;
Regjistrat Civilë – Serbia po i mban origjinalet, kurse kopjet po i verifikon EULEX-i. E kemi parë një dëm të madh nga kjo marrëveshje në zgjedhjet e vitit 2013, kur kemi pasur një numër të madh të serbëve që kanë votuar në Serbi, të cilët nuk mund t’i verifikojmë;
Pranimi i Diplomave Universitare – Serbia nuk i pranon ende diplomat e Kosovës sepse e ka hedhur poshtë Gjykata Kushtetuese atje, kurse Kosova i pranon ato të Serbisë. Pra, Serbia u tërhoq nga marrëveshja përmes institucioneve të saj;
Menaxhimi i Integruar i Kufijve – i kemi parë se çfarë maltretimesh iu bëhen bashkëatdhetarëve tanë;
Përfaqësimi dhe Bashkëpunimi Rajonal – Kosova hoqi dorë nga Republika dhe ende e mbanë fusnotën me R-1244, kurse Serbia vazhdon fushatën e egër kundër anëtarësimit të Kosovës në UNESCO;
Marrëveshja për të Hyrat Doganorë – kjo funksionon, sepse të hyrat që mblidhen aty shkojnë direkt në fondin për zhvillimin e veriut, pra në buxhetin e “Zajednicës”, dhe në asnjë mënyrë nuk kontribuojnë në buxhetin e Kosovës;
Telekomi dhe Energjia – janë arritur si marrëveshje në vitin 2013, dhe janë rinegociuar dhe nënshkruar sërish në gusht të vitit 2015. Me këtë rast fragmentarizohet tregu i telekomunikacionit dhe energjisë në Kosovë, si dhe legalizohet ndërhyrja ilegale e deritashme e Serbisë në këta dy sektorë;
Marrëveshja për shpërbërjen e të ashtuquajturës “mbrojtja civile” – nuk është zbatuar asnjëherë. Sot e kësaj dite janë funksionale këto struktura në veri.
