“Ne do të vazhdojmë së insistuari për dialog dhe për zgjidhje të problemeve në qarkullimin e lirë të mallrave e të njerëzve, për shkak se ka hapësirë për biznesin serb në çdo vend të Kosovës, e jo vetëm atje ku jetojnë serbët”, citon Tanjug të ketë thënë Vuçiq, transmeton Koha.net.
Vuçiq ka theksuar se e kanë habitur deklaratat që ka në ardhur nga Prishtina pas rundit më të ri të dialogut Beograd- Prishtinë, sepse, sipas tij, nuk kanë shumë lidhje me realitetin.
“Kanë folur disa gjëra që fare nuk kanë ndodhur në bisedimet tona. Nëse kjo dikujt i pëlqen, le ta bëjë këtë, por ajo nuk ka shumë lidhje me realitetin”, ka thënë Vuçiq.
Sipas fjalëve të tij, është e qartë se “disa nga ata” nuk mund të tërhiqen nga problemet ditore politike dhe kokën e kanë më shumë te disa zgjedhje të ardhshme sesa në zgjidhjen aktuale të problemeve. Ai, siç ka thënë, shpreson që kjo të tejkalohet dhe që sërish do të bisedohet për temat me rëndësi për përmirësimin e jetës së qytetarëve.
