Pas vendimit të kryesisë së Kuvendit që seanca e ndërprerë javën e kaluar të vazhdojë të premten pasdite, deputeti i Vetëvendosjes Faton Topalli tha për KALLXO.com paralajmëroi “kreativitet” nga ana e deputetëve të opozitës.
Deri më tani, në mënyrën e vet opozita ka përdorë filikaqat, ujin dhe gazin lotsjellës në përpjekje për t’i penguar seancat e Kuvendit.
“Ne do të përpiqemi të jemi kreativ, nesër do të jetë mbledhja e grupit parlamentar, por do të mblidhemi dhe do të koordinohemi edhe me opozitën për hapat tjerë para seancës”, tha Topalli.
Ai përsëriti qëndrimin e opozitës se seancat nuk duhet të thirren derisa kryeministri Isa Mustafa ta tërheqë nënshkrimin e tij nga marrëveshjet e nënshkruara në Bruksel.
“Është hap i ngutur. Ne si lëvizje kemi nesër mbledhjen e kryesisë dhe grupit parlamentar kështu që për çështje të cilat shtrohen do të marrim qëndrime tek nesër”, tha Topalli.
