Qendra e Lëvizjes Vetëvendosje në Gjilan ka njoftuar se bashkatdhetarë nga vende të ndryshme të botës kanë ardhur në Kosovë për të marrë pjesë në një takim me kandidatët për deputetë.
Sipas njoftimit, gjatë takimit u diskutua për politikat që synojnë forcimin e lidhjeve ndërmjet shtetit dhe mërgatës, përfshirë investimet e diasporës, bashkërendimin e dijes dhe teknologjisë, lehtësirat për transferet financiare, digjitalizimin e shërbimeve konsullore dhe mësimin e gjuhës shqipe për fëmijët që jetojnë jashtë vendit.
Po ashtu, u theksua edhe mundësia e rikthimit të shtetësisë së Kosovës për pjesëtarët e mërgatës që e kanë humbur atë për shkak të kufizimeve ligjore në shtetet ku jetojnë.
Në postimin e saj, Vetëvendosje në Gjilan e vlerësoi mërgatën si një faktor të rëndësishëm në zhvillimin dhe forcimin e shtetit të Kosovës.
