Të enjten, asamblistët e Komunës së Mitrovicës së Veriut, kanë miratuar kërkesën për hapjen për qarkullim të urës kryesore mbi lumin Ibër. Vendimi për hapjen e Urës së Ibrit i është dorëzuar tashmë Ministrisë së Administrimit dhe Pushtetit Lokal.
MAPL ka pranuar sot këtë vendim të Kuvendit Komunal në Mitrovicë, por ende nuk është dhënë një qëndrim për këtë.
Gazeta Insajderi ka siguruar vendimin e dërguar në MAPL.
Aty theksohet se vendimi është miratuar me shumicë votash.
Dokumenti i dërguar sot në MAPL
Insajderi ka provuar të marrë përgjigje zyrtare nga ana e Ministrisë së Administrimit dhe Pushtetit Lokal por deri me tani nuk kanë kthyer përgjigje.
Hapja e Urës së Ibrit, në dorën e ministrisë së Sveçlës dhe Krasniqit
Aktualisht vendimi për hapjen e Urës së Ibrit ka kaluar në dorë të Ministrisë së Punëve të Brendshme dhe Ministrisë së Administrimit dhe Pushtetit Lokal.
Emir Azemi, ish-asamblist i PDK-së në Kuvendin Komunal të Mitrovicës së Veriut, ka thënë se në bazë të informacioneve që posedon, vendimi për hapjen e Urës së Ibrit iu është dorëzuar dy institucioneve qëndrore – Ministrisë së Punëve të Brendshme dhe Ministrisë së Administrimit dhe Pushtetit Lokal.
Azemi, në një prononcim për Gazetën Insajderi, e ka quajtur të ligjshëm vendimin, meqë, sipas tij, është votuar nga Kuvendi Komunal dhe nuk ka parë arsye për shtyrjen e tij.
Kërcënime nga Serbia për mos hapje të Urës së Ibrit
Pas njoftimit se është marrë vendimi që të hapet ura mbi lumin Ibër për qarkullim të automjeteve dhe lëvizje të lirë. Lista Serbe ka lëshuar kërcënime se nëse kjo ndodh do të ketë incidente.
Në një reagim të lëshuar, nga kjo parti e kanë quajtur vendimin që u mor me shumicë votash si “jolegjitim” dhe në kundërshtim me marrëveshjet e arritura në Bruksel.
“Duam të paralajmërojmë se hapja e mundshme e urës padyshim që do të rezultojë me incidente në këtë zonë, gjë që duket se është edhe qëllimi i Prishtinës”, thuhej në reagim.
Reagimet për çështjen e Urës së Ibrit
Propozimi i asamblistes nga radhët e Lëvizjes Vetëvendosje, Aida Ferati-Doli është cilësuar si i nxituar.
Miroslav Lajçak ka thënë se nuk është koha për ta bërë një gjë të tillë. Rihapja e urës, sipas KFOR-it duhet të zgjidhet përmes dialogut politik.
Për këtë çështje është deklaruar edhe misioni i KFOR-it.
“Rihapja e urës është një çështje që duhet të zgjidhet përmes dialogut politik. Misioni i NATO-s, KFOR, vazhdon të monitoroj zhvillimet lokale dhe qëndron plotësisht i fokusuar në implementimin ditor të mandatit të tij, bazuar në Rezolutën e Këshillit të Sigurimit 1244 e vitit 1999, për të siguruar një ambient të sigurt dhe lëvizje të lirë për të gjitha komunitetet në Kosovë”, kanë thënë nga KFOR.
Por, këtë vendim e ka përkrahur Qeveria e Kosovës, duke thënë se është vendim i drejtë dhe i duhur.
“Çfarëdo pengese në lirinë e lëvizjes cenon këtë të drejtë themelore. Prandaj edhe vendimi për heqjen e pengesave të tilla është veprim i drejtë dhe i duhur”, ka thënë Qeveria për RTK.
