Partia e Ramush Haradinajt dhe ajo e Isa Mustafës assesi t’i qetësojnë raportet mes vete. Së paku jo në komunikata e herë-herë edhe në deklarime publike. Ishte lideri i AAK-së, Ramush Haradinaj, ai që sot e nisi ‘luftën’ me ish-partnerin e tij në koalicionin qeverisës të vitit 2004, LDK-në, që tashmë drejtohet nga kreu i Qeverisë, Isa Mustafa.
Gjatë një tubimi mobilizues të opozitës së bashkuar të mbajtur gjatë ditës së sotme në sallën “1 Tetori” në Prishtinë, Haradinaj tha se Thaçi e Mustafa e kanë shndërruar Kosovën në poligon të hajnisë dhe krimit.
Ndaj kësaj deklarate reagoi LDK, e cila tha se “Haradinaj është personi i fundit që mund të shesë moral për hajni e krim”.
Por, nuk shkoi shumë dhe kundërreagimi nga ana e AAK-së, erdhi. AAK tash po kërkon përgjegjësi për hisen që thotë se LDK e ka në rrezikimin e shtetit dhe të territorit të Kosovës.
“LDK, përpara se të shkruaj një paçavure në formë komunikate, me një gjuhë qyqare kundër partive opozitare, me lloj-lloj ofendimesh, herë për “brigadat e kuqe” e herë për “koalicionin e mollotoveve”, duhet të japë përgjegjësi për hisen e saj në rrezikimin e shtetit dhe të territorit të Kosovës”, thuhet në reagimin e AAK-së.
Më tej, AAK, në këtë reagim, thotë se pretendimet për pasuri marramendëse të Haradinajt janë krejtësisht trillime dhe se të njëjtave “tashmë ju ka dalë boja dhe ato nuk do të mund t’i mbulojnë veprimet anti Kosovë të atij grupi të vogël udhëheqësish të LDK-së, të cilët qëndrojnë prapa trillimeve, siç është edhe kjo komunikatë e sotme”.
“Haradinaj e ka transparente pasurinë e tij dhe nuk ka kurrfarë afere me privatizimin e kurrfarë toke. Por ai dhe Partia e tij, nuk do të zmbrapsen pa i zbardhur krejt faqet e zeza të kësaj qeverie duke përfshirë edhe banditët e vegjël, që s’kanë lënë gjë pa vjedhur e pushtet pa i shërbyer. Pikërisht ky grup e ka kapur edhe LDK-në e Presidentit Rugova, por shumë shpejt, këta dhe të tjerët do ta marrin përgjigjen e qytetarëve të Kosovës, në mesin e të cilëve, pa asnjë dyshim, do të jetë edhe elektorati i LDK-së”, thotë AAK.
Në fund, subjekti politik i Haradinajt ka thënë se një gjë është e sigurt: “… sado të shumta të jenë gabimet e Opozitës, ato nuk do të mund t’i mbulojnë faqet e zeza e dosjet e lidershipit të LDK-së e as marrëveshjet e Qeverisë që e kanë nxjerrë vendin në pazar, bash si me ia u pas lanë baba!”.
TEMAT:LDKAAKAKUZA
