Komisioni për Punë të Jashtme i Kuvendit të Kosovës ka pritur në një takim disa përfaqësues të shoqërisë civile të shtetit të Qipros, vend ky i cili ende nuk e ka njohur pavarësinë e Kosovës.
Në këtë takim, është biseduar rreth shkëmbimit të përvojave mes Kosovës dhe Qipros, derisa ligjvënësit kosovar shtruan nevojën që Qipro ta njoh sa më shpejt pavarësinë e Kosovës.
Një takim i institucioneve të Kosovës dhe shoqërisë civile të Qipros është i pari i këtij niveli, meqë në të kaluarën nuk ka pasur asnjë komunikim mes këtyre dy vendeve.
Nënkryetarja e Komisionit për Punë të Jashtme, Teuta Rugova tha pas takimit se me përfaqësuesit e shoqërisë civile të Qipros, biseduan për shumë tema, sidomos për atë të shkëmbimit të përvojave tëtë dyja shteteve. Por edhe njohja nga Qipro u shtrua si çështje nga deputetët e Kuvendit të Kosovës.
“Si temë të parë patëm shkëmbimin e përvojave nga të dyja shtetet që kemi, sidomos Kosova që nga vitet e pasluftës me organizatat joqeveritare. Sigurisht që u potencua nevoja që ky shtet ta njoh Kosovën sa më shpejt që do t’i ndihmoj Kosovës, sidomos në bashkëpunim me shoqërinë civile nga Qiproja dhe shtetet e tjera. Gjithashtu, treguam se Kosova respekton komunitetet jo pakicë, të drejtat gjinore që Kosova çdo ditë e më shumë po i përparon dhe premtuam që do të kemi bashkëpunim në të ardhmen”, tha Rugova.
Ndonëse, është shtruar nevoja e njohjes së Kosovës nga Qipro, shoqëria civile e këtij vendi nuk ka dhënë arsye se pse ende vendi i tyre nuk po e njeh Kosovën.
“Jo, arsyet nuk i treguan por normal që premtuan bashkëpunim sa më të afërt që do të ndihmoj që në të ardhmen e afërt të kemi njohjen nga ky shtet”, theksoi ajo.
Takimi mes Komisionit për Punë të Jashtme të Kuvendit të Kosovës dhe përfaqësuesve të shoqërisë civile të Qipros, është organizuar nga BritishCouncil e cila organizon bashkëpunim mes institucioneve të Kosovës dhe pesë vendeve të BE-së, të cilat ende nuk e kanë njohur pavarësinë e Kosovës. /zeri/
