Duke u nisur nga gjetjet e Auditorit Gjeneral, Prokuroria e Kosovës deri më tash ka bërë publike vetëm një rast që ka nisur hetimet. Cak i Prokurorisë para disa ditëve ka qenë kryetari i Klinës, Sokol Bashota. Nga raportet e publikuara për vitin 2014 të ZAP-it gazeta ka evidentuar dhjetëra shkelje për të cilat nuk dihet nëse janë duke u hetuar. Gjetjet kryesisht kanë të bëjnë me mosrespektimin e Ligjit të Prokurimit Publik
Komunat e Kosovës kanë bërë shkelje të shumta penale gjatë punës së tyre njëvjeçare në vitin 2014. Duke u nisur nga gjetjet e Zyrës së Auditorit të Përgjithshëm (ZAP), Prokuroria e Kosovës deri më tash e ka bërë publike vetëm një rast që ka nisur hetimet. Cak i Prokurorisë para disa ditëve ka qenë kryetari i Klinës, Sokol Bashota. Nga raportet e publikuara për vitin 2014 të ZAP-it gazeta ka evidentuar dhjetëra raste dyshuese, të cilat nëse do të vërtetoheshin nga drejtësia si të tilla do të përbënin vepër penale.
Gjetjet kryesisht kanë të bëjnë me mosrespektimin e Ligjit të Prokurimit Publik. Zyra për medie e Prokurorisë së Kosovës nuk ka dashur të përgjigjet rreth asaj nëse është nisur ndonjë hetim për shkeljet e evidentuara nga Zyra e Auditorit Gjeneral. Ilire Daija-Buza, u.d. i drejtorit të përgjithshëm në Zyrën e Auditorit të Përgjithshëm, ka thënë se Auditori asnjë rast nuk e ka dërguar në Prokurori, meqë raportet janë publike. “Ne si ZAP nuk kemi dërguar veçanërisht asnjë rast në Prokurori.
Kjo për shkakun se të gjitha raportet e auditimit janë raporte publike dhe përmbajnë informata të bollshme që të analizohen qoftë nga Prokuroria apo institucionet tjera relevante. Sa i përket kësaj çështjeje marrëdhëniet tona janë të mira dhe efektive. Gjatë këtij viti ne kemi rritur bashkëpunimin tonë sidomos me prokuroritë dhe Departamentin Special Antikorrupsion në Policinë e Kosovës dhe Agjencinë Kundërkorrupsionit”, ka thënë Daija-Buza për “Zërin”.
