Me sloganin “Shumë të rinj për të kujtuar, vendosën për të mos harruar”, të rinjtë e Beogradit do të nderojnë viktimat e luftës në Kosovë, të shkaktuara nga krimet e ushtrisë dhe policisë serbe.
Të rinjtë e Beogradit nga Nisma e të Rinjve për të Drejtat e Njeriut dhe Lëvizja Nisma Ime, do të marshojnë për gati 20 kilometra, për të nderuar viktimat civile të shkaktuara nga aksionet e ushtrisë dhe policisë serbe gjatë luftës në Kosovë.
Këta të rinj do të ngrisin zërin për t’i thënë “Jo në emrin tonë!”. Lexojeni të plotë njoftimin e të rinjve nga Beogradi:
Nisma e të Rinjve për të Drejtat e Njeriut dhe Lëvizja Nisma Ime, të shtunën më 26 Mars në ora 12:00, do të organizojnë një ecje 20 kilometra të gjatë, nga sheshi i Republikës deri në Batajnicë, ku ndodhen poligonat e ushtrisë speciale anti- terroriste. Në vitin 2001, aty është zbuluar varreza masive ku janë gjetur 700 trupa të shqiptarëve nga Kosova, në mesin e tyre janë gjetur edhe viktimat e krimeve në Suharekë.
Masakra në Suharekë është një ndër krimet më të rënda që ka ndodhur në fillimet e intervenimeve të NATO-s. Dy ditë pas fillimit të intervenimit, më 26 Mars në vitin 1999, pjesëtarët e Ministrisë së Punëve të Brendshme të Serbisë kanë vendosur që t’i fusin fëmijët, gratë, dhe burrat mbrenda në një lokal te picerisë “Kalabrija” ku edhe kanë hedhur dy bomba të dorës, pastaj kanë gjuajtur me armë automatike drejt atyre, që i kanë mbijetur shpërthimit të bombave. Numri total i njerëzve që kanë humbur jetën është 48 persona, prej tyre 46 persona kanë qenë pjesë e familjes Berisha. Për këtë krim, Departamenti për Krime të Luftës në gjyq të lartë në Beograd ka dënuar katër pjesëtarët e Ministrisë së Punëve të Brendshme me shumë vjet dënimi në burg.
Ecja do të organizohet për të rikujtuar rolin e organeve shtetërore në krimet sistematike, të cilat janë kryer në Kosovë si protestë kundër politikave shtetërore, të cilat sot rehabilitojnë kriminelët e luftës. Mesazhin që duam ta përcjellim me anë të këtij tubimi publik është se nuk pranojmë që kriminelët e luftës dhe mizoritë, sikur masakra ne Suharekë, të thuhen se janë bërë në emrin tonë. Që Ministri i Drejtësisë Selakoviq mos të flasë në emrin tonë kur thotë që krimineli i luftës Lazareviq duhet të jetë “shembull për të rinjtë”, që Ministri i Mbrojtjës Gashiq mos të flasë në emrin tonë kur thotë që krimineli i luftës Lazareviq “ka mbrojtur fuqishëm flamurin e Serbisë”, kur Ministri i Punës dhe i Veteranëve Vulin mos të flasë në emrin tonë kur thotë që krimineli i luftës, i cili është i dënuar Lazareviq është “krenaria e shtetit të Serbisë”.
Me këtë ecje, dërgojmë mesazhin që kriminelët e luftës si Vladimir Lazareviq dhe Nikola Shainoviq, të cilët kanë gjetur sigurim dhe përkrahje nga ana e koalicionit qeveritar menjëherë pasi që kanë përfunduar dënimin e tyre për rolin, të cilin e kanë pasur gjatë krimeve të luftës, që flamuri i Serbisë në fakt është i zhytur në baltë dhe që ata janë turpi më i madhë i Serbisë. Duke shpall kriminelët në hero, qeveria aktuale e Serbisë na kthen në një periudhë të errët, në të cilën gjenerata e të rinjve të Serbisë do të ballafaqohen me pasojat, kështu, këta të rinj do të duhen të luftojnë tërë kohën për të pasur një jetë normale.
Ejani të shtunën, më 26 mars në ora 12:00 te sheshi i Republikës për të vazhduar deri në Batajnicë, që të nderojmë më shumë se 8 mijë viktima civile të shkaktuara nga aksionet e ushtrisë dhe policisë serbe gjatë luftës në Kosovë dhe së bashku të themi “Jo në emrin tonë!”, thuhet në njoftim.
